Genesis 14:1-24
14 Yana ha mga adlaw nira Amrafel nga hadi han Sinar,+ Arioc nga hadi han Elasar, Kedorlaomer+ nga hadi han Elam,+ ngan Tidal nga hadi han Goiim,
2 ini hira nakiggirra kanda Bera nga hadi han Sodoma,+ Birsa nga hadi han Gomorra,+ Sinab nga hadi han Adma, Semeber nga hadi han Zeboiim,+ ngan ha hadi han Bela, nga amo an Zoar.
3 Gin-urosa nira ngatanan an ira kasundalohan ha Walog* han Sidim,+ nga amo an Dagat nga Asin.*+
4 Nagserbi hira* kan Kedorlaomer hin 12 ka tuig, pero nagrebelde hira han ika-13 ka tuig.
5 Salit ha ika-14 ka tuig, hi Kedorlaomer ngan an mga hadi nga kaupod niya inabot ngan ginpirde an mga Refaim ha Asterot-karnaim, an mga Zuzim ha Ham, an mga Emim+ ha Save-kiriataim,
6 ngan an mga Horita+ ha ira bukid ha Seir+ tubtob ha El-paran nga aadto ha kamingawan.
7 Katapos, binalik hira ngan inabot ha En-mispat, nga amo an Kades,+ ngan ginsakop an bug-os nga teritoryo han mga Amalekita+ ngan pati han mga Amorita+ nga naukoy ha Hazazon-tamar.+
8 Hini nga takna, an hadi han Sodoma nagmartsa, ngan pati an hadi han Gomorra, an hadi han Adma, an hadi han Zeboiim, ngan an hadi han Bela, nga amo an Zoar, ngan pinwesto hira basi makiggirra kontra ha ira ha Walog* han Sidim,
9 kontra kanda Kedorlaomer nga hadi han Elam, Tidal nga hadi han Goiim, Amrafel nga hadi han Sinar, ngan Arioc nga hadi han Elasar+—upat nga hadi kontra ha lima.
10 Yana an Walog* han Sidim lukop hin mga buho nga puno hin alkitran, ngan an mga hadi han Sodoma ngan Gomorra nagsari pagpalagiw ngan nahulog ngada hito, ngan an mga nahibilin namalagiw ngadto ha kabukiran.
11 Katapos, ginkuha han mga nagdaog an ngatanan nga panag-iya han Sodoma ngan Gomorra ngan an ngatanan nga ira pagkaon ngan linakat hira.+
12 Ira liwat ginkuha hi Lot, an anak nga lalaki han bugto ni Abram nga naukoy ha Sodoma,+ sugad man an iya mga panag-iya, ngan padayon hira nga linakat.
13 Katapos hito, usa nga lalaki nga nakapalagiw an inabot ngan nagsumat kan Abram nga Hebreo. Hadto naukoy hiya* ha butnga han dagku nga kakahoyan ni Mamre nga Amorita,+ an bugto nira Escol ngan Aner.+ Ini nga mga lalaki mga kaalyado ni Abram.
14 Salit nahibaroan ni Abram nga nabihag an iya paryente.*+ Tungod hito iya igin-andam an iya binansay nga kalalakin-an, 318 nga surugoon nga natawo ha iya panimalay, ngan ginlanat nira an mga nagbihag tubtob ha Dan.+
15 Durante han gab-i, iya gintunga an iya kasundalohan, ngan hiya ngan an iya mga surugoon inatake ngan ginpirde hira. Ngan iya ginlanat hira tubtob ha Hoba nga aadto ha norte han Damasco.
16 Nabawi niya an ngatanan nga panag-iya, ngan nabawi liwat niya an iya paryente nga hi Lot, an iya mga panag-iya, an mga babaye, ngan an iba pa nga mga tawo.
17 Han binalik hi Abram katapos pirdihon hi Kedorlaomer ngan an mga hadi nga iya kaupod, an hadi han Sodoma ginawas basi tapoon hi Abram ha Walog* han Save, nga amo an Walog han Hadi.+
18 Ngan hi Melkizedek+ nga hadi han Salem+ nagdara hin tinapay ngan bino; saserdote hiya han Gihitaasi nga Dios.+
19 Katapos, iya ginbendisyonan hiya ngan nagsiring:
“Bendisyonan unta hi Abram han Gihitaasi nga Dios,Hiya nga naghimo han langit ngan tuna;
20 Ngan pagdayawon an Gihitaasi nga Dios,Nga nagtubyan ngada ha imo han mga nagtatalumpigos ha imo!”
Ngan gintagan hiya ni Abram hin ikanapulo han ngatanan nga butang.+
21 Katapos hito, an hadi han Sodoma nagsiring kan Abram: “Ihatag ha akon an mga tawo,* pero kuhaa an mga panag-iya.”
22 Kondi hi Abram nagsiring ha hadi han Sodoma: “Gin-aalsa ko an akon kamot ha panumpa kan Jehova an Gihitaasi nga Dios, Hiya nga naghimo han langit ngan tuna,
23 nga diri ko kukuhaon an bisan ano nga imo, tikang ha inulang ngadto ha sintas han sandalyas, basi diri ka makasiring, ‘Ako an nagpariko kan Abram.’
24 Waray ako kukuhaon nga bisan ano gawas la han ginkaon na han batan-on nga mga lalaki. Mahitungod han malon han mga lalaki nga inupod ha akon, hira Aner, Escol, ngan Mamre+—pakuhaa hira han ira malon.”
Mga footnote
^ O “Hamubo nga Kapatagan.”
^ Karuyag sidngon, an Dagat nga Patay.
^ Dinhi, an “hira” baga hin nagtutudlok ha 5 nga hadi nga gin-unabi ha ber. 2.
^ O “Hamubo nga Kapatagan.”
^ O “Hamubo nga Kapatagan.”
^ O “naukoy hiya ha mga tolda.”
^ Lit., “bugto.”
^ O “Hamubo nga Kapatagan.”
^ O “mga kalag.”
