Genesis 39:1-23
39 Yana hi Jose gindara ngadto ha Ehipto,+ ngan may Ehiptohanon nga an ngaran hi Potipar,+ usa nga opisyal ha palasyo han Paraon ngan lider han mga gwardya han hadi, nga nagpalit ha iya tikang ha mga Ismaelita+ nga nagdara ha iya didto.
2 Pero kaupod ni Jose hi Jehova.+ Salit nagmalampuson hiya ngan gintaporan ha panimalay han iya agaron nga Ehiptohanon.
3 Ngan nakita han iya agaron nga kaupod niya hi Jehova ngan ginpapalampos ni Jehova an ngatanan nga iya ginbubuhat.
4 Padayon nga iya ginpakitaan hi Jose hin pag-uyon, ngan hiya nagin personal nga kabulig niya. Salit igintapod niya kan Jose an iya panimalay, ngan hiya an iya ginpadumara han ngatanan niya nga gintatag-iya.
5 Tikang han igintapod niya kan Jose an iya panimalay ngan ginpadumara han ngatanan niya nga gintatag-iya, padayon nga ginbendisyonan ni Jehova an panimalay han Ehiptohanon tungod kan Jose, ngan ginbendisyonan ni Jehova an ngatanan niya nga gintatag-iya dida ha balay ngan ha uma.+
6 Ha urhi, hi Jose na an iya ginpaasikaso han ngatanan niya nga gintatag-iya, ngan diri na niya ginhuhunahuna an bisan ano gawas la han pagkaon nga iya ginkakaon. Dugang pa, nagdaku hi Jose nga maskulado ngan gwapo.
7 Katapos hito, an asawa han agaron ni Jose naruyag ha iya ngan nagsiring: “Dirig ha akon.”
8 Pero diniri hiya ngan nagsiring ha asawa han iya agaron: “Kitaa, an akon agaron diri maaram kon ano an aadi ha akon hini nga balay, ngan igintapod niya ha akon an pag-asikaso han ngatanan niya nga gintatag-iya.
9 Waray bisan hin-o nga mas labaw ha akon dinhi hini nga balay, ngan waray niya igdiri ha akon an bisan ano gawas la ha imo, kay asawa ka niya. Salit paonan-o ko mabubuhat inin daku nga karaotan ngan makasala kontra ha Dios?”+
10 Salit adlaw-adlaw nga nakiistorya hiya kan Jose, pero waray gud hi Jose maruyag nga dumirig ha iya o magpabilin upod niya.
11 Pero usa ka adlaw han sinulod hi Jose ha balay basi magtrabaho, waray mga surugoon ha panimalay nga nakadto.
12 Katapos, ginkaptan hiya han babaye ha iya bado ngan ginsidngan: “Dirig ha akon!” Pero nahibilin an iya bado ha kamot han babaye ngan dinalagan hiya tipagawas.
13 Pakakita gud han babaye nga nabilin ni Jose an iya bado ha iya kamot ngan dinalagan tipagawas,
14 ginuliat hiya ha mga tawo ha iya balay ngan siniring ha ira: “Kitaa! Gindara niya ha aton ini nga lalaki nga Hebreo basi himoon kita nga pataraw-an. Kinadi hiya ha akon basi dumirig ha akon, pero ginuliat ako tubtob ha akon mahihimo.
15 Katapos, pakabati gud niya nga gindaku ko an akon tingog ngan ginuliat, nabilin niya an iya bado ha akon sapit ngan dinalagan tipagawas.”
16 Katapos hito, iginbutang han babaye ha iya sapit an bado ni Jose tubtob han pag-uli ni Potipar nga agaron ni Jose.
17 Katapos, amo gihapon an iginsumat ha iya han babaye, nga nasiring: “An Hebreo nga surugoon nga imo gindara ha amon kinadi ha akon basi himoon ako nga pataraw-an.
18 Pero pagdakua ko gud han akon tingog ngan nagtikang pagguliat, nabilin niya an iya bado ha akon sapit ngan dinalagan tipagawas.”
19 Pakabati gud han agaron ni Jose han iginsumat ha iya han iya asawa, nga nasiring: “Ini an ginbuhat ha akon han imo surugoon,” naglarab an iya kasina.
20 Salit gin-aresto hi Jose han iya agaron ngan iginkadto hiya ha prisohan, nga ginbutangan han mga iginpapriso han hadi, ngan nagpabilin hiya didto ha prisohan.+
21 Pero padayon nga kaupod ni Jose hi Jehova ngan pirme hiya ginpapakitaan hin maunungon nga gugma ngan ginbibendisyonan hiya nga makakarawat hin pag-uyon han hitaas nga opisyal han prisohan.+
22 Salit igintapod kan Jose han hitaas nga opisyal han prisohan an ngatanan nga priso, ngan an ngatanan nga ira ginbubuhat didto, hiya an nagsusugo han ira pagbubuhaton.+
23 Diri na gud ginpapanginano han hitaas nga opisyal han prisohan an igintapod kan Jose, kay hi Jehova kaupod ni Jose ngan ginpapalampos ni Jehova an bisan ano nga iya ginbubuhat.+
