Hosea 1:1-11
1 An pulong ni Jehova nga inabot kan Hosea* nga anak nga lalaki ni Beeri ha mga adlaw nira Uzias,+ Jotam,+ Ahaz,+ ngan Hezekias,+ nga mga hadi han Juda,+ ngan ha mga adlaw ni Jeroboam+ nga anak nga lalaki ni Joas+ nga hadi han Israel.
2 Han iginyakan ni Jehova an iya pulong pinaagi kan Hosea, hi Jehova nagsiring kan Hosea: “Kadto, pag-asawa hin babaye nga magbubuhat hin prostitusyon* ngan magkaada ka mga anak ha iya pagbuhat hin prostitusyon,* kay pinaagi han prostitusyon* an tuna bug-os nga binaya ha pagsunod kan Jehova.”+
3 Salit kinadto hiya ngan gin-asawa hi Gomer nga anak ni Diblaim, ngan nagburod hiya ngan nagkaada hira anak nga lalaki.
4 Katapos, hi Jehova nagsiring kan Hosea: “Jezreel* an igngaran ha iya, kay diri mag-iiha sisirotan ko an panimalay ni Jehu+ tungod han pamatay* ha Jezreel, ngan akon pauundangon* an paghadi han panimalay ni Israel.+
5 Hito nga adlaw akon babarion an pana han Israel ha Walog* han Jezreel.”
6 Nagburod na liwat hiya ngan nag-anak hin babaye. Ngan Hiya nagsiring kan Hosea: “Lo-ruhama* an igngaran ha iya, kay diri na ako magpapakita hin kalooy+ ha panimalay ni Israel, kay sigurado nga paiiwason ko hira.+
7 Pero magpapakita ako hin kalooy ha panimalay ni Juda,+ ngan tatalwason ko hira pinaagi kan Jehova nga ira Dios;+ diri ko hira tatalwason pinaagi hin pana o pinaagi hin espada o pinaagi hin girra o pinaagi hin mga kabayo o pinaagi hin mga parapangabayo.”+
8 Han nalutas na hi Lo-ruhama, nagburod hi Gomer ngan nag-anak hin lalaki.
9 Katapos, Hiya nagsiring: “Lo-ami* an igngaran ha iya, kay diri ko kamo katawohan ngan diri ako magigin iyo.
10 “Ngan an kadamu han katawohan* han Israel magigin sugad kadamu han mga baras ha dagat nga diri matakos o maihap.+ Ngan ha lugar diin ginsiring ini ha ira, ‘Diri ko kamo katawohan,’+ igsisiring ini ha ira, ‘An mga anak han buhi nga Dios.’+
11 Ngan an katawohan han Juda ngan han Israel magtitirirok nga urosa+ ngan magpipili hira hin usa nga lider ngan magawas ha tuna, kay magigin importante ito nga adlaw ha Jezreel.+
Mga footnote
^ An ginpahalipot nga porma han Hosaias, nga nangangahulogan nga “Gintalwas ni Jah; Hi Jah Nagtalwas.”
^ O “imoralidad; nga makihilawason.”
^ O “imoralidad; pagin makihilawason.”
^ O “imoralidad; pagin makihilawason.”
^ Lit., “pagpaagay hin dugo.”
^ Ha iba nga lugar, “patutukoon.”
^ Nangangahulogan nga “An Dios Magsasabwag hin Binhi.”
^ O “Hamubo nga Kapatagan.”
^ Nangangahulogan nga “Waray Kalooyi.”
^ Nangangahulogan nga “Diri Akon Katawohan.”
^ Lit., “mga anak.”
