Hosea 10:1-15
10 “An Israel nagtitikaraot* nga tanom nga ubas nga namumunga.+
Samtang nagdadamu an iya bunga, ginpapadamu niya an iya mga halaran;+Samtang nagigin maopay an mga produkto han iya tuna, nagigin makaruruyag gud an iya sagrado nga mga harigi.+
2 An ira kasingkasing hipokrito;*
Yana makikita nga salaan hira.
Iya gugubaon an ira mga halaran ngan bubungkagon an ira mga harigi.
3 Yana hira masiring, ‘Waray kami hadi,+ kay diri kami nahahadlok kan Jehova.
Ngan ano an mahihimo han hadi para ha amon?’
4 Nagyayakan hira hin waray pulos nga mga pulong, naghihimo hin buwa nga mga panumpa,+ ngan naghihimo hin mga kasabotan;Salit an paghukom nga naulpot pariho hin nakakahilo nga mga banwa dida ha mga tudling ha uma.+
5 An mga umurukoy han Samaria mahahadlok para ha idolo nga nati nga baka han Bet-aven,+An katawohan hito mabibido para hito,Sugad man an mga saserdote han mga dios han iba nga mga nasud nga nagrayhak tungod hito ngan han himaya hito,Kay mabaya ito ha ira ngadto ha pagkadistyero.
6 Dadad-on ito ngadto ha Asirya sugad nga regalo ha harangdon nga hadi.+
Mahibubutang ha kaarawdan an Efraim,Ngan maaawod an Israel tungod han sagdon nga ginsunod hito.+
7 An Samaria ngan an hadi hito sigurado nga pagwawad-on,*+Pariho hin nabanggi nga gutiay nga sanga ha bawbaw han tubig.
8 An higtaas nga mga lugar han Bet-aven,+ nga nagin hinungdan han pakasala han Israel,+ pagwawad-on.+
Manunubo ha ira mga halaran an katunokan ngan kabanwaan.+
An katawohan masiring ha kabukiran, ‘Tabuni kami!’
Ngan ha kabungtoran, ‘Matimpag kamo ha amon!’+
9 Tikang ha mga adlaw han Gibeah nakasala ka,+ O Israel.
Didto waray hira magbag-o.
Waray maabti* han girra an mga anak ha pagkadiri-matadong didto ha Gibeah.
10 Didisiplinahon ko liwat hira kon karuyag ko.
Ngan an mga katawohan magtitirirok kontra ha ira,Ha panahon nga nakataod ha ira an ira duha nga pagtalapas.*
11 An Efraim usa nga binansay nga dumaraga nga baka nga mahilig maggiok,Salit waray ko labti an iya maopay nga liog.
Yana may-ada ako papasakyon ha* Efraim.+
An Juda mag-aarado; an Jacob magsusurod para ha iya.
12 Pagsabwag kamo hin binhi para ha iyo uyon ha katadongan ngan aniha an maunungon nga gugma.
Pag-arado kamo hin tuna nga mauuma+Samtang may panahon pa ha pagpamiling kan Jehova,+Tubtob nga umabot hiya ngan magtutdo ha iyo uyon ha katadongan.+
13 Pero nag-arado kamo hin karaotan,Nag-ani kamo hin pagkadiri-matadong+Ngan ginkaon niyo an bunga han panlimbong;Kay sinarig kamo ha iyo kalugaringon nga paagi,Ha iyo damu nga girriro.
14 Magkakaada hin kasamok kontra ha imo katawohan,Ngan mabubungkag an ngatanan mo nga pinader nga syudad,+Pariho han kabungkagan nga ginhimo ni Salman ha balay ni Arbel,Ha adlaw han girra han ginpamusak an mga nanay upod an ira mga anak.
15 Ini an bubuhaton ha imo, O Bethel,+ tungod han imo duro nga karaotan.
Ha maagahon an hadi han Israel sigurado nga pagwawad-on.”*+
Mga footnote
^ O posible nga “nagtitikarabong.”
^ O “madalunot; mahamis.”
^ Lit., “pahihilumon.”
^ O “mapoo.”
^ Karuyag sidngon, ha panahon nga ira ginpapas-an an sirot pariho hin yugo.
^ O “tataoran ko hin higot an.”
^ Lit., “pahihilumon.”
