Mga Hukom 12:1-15
12 Katapos, iginpatawag an kalalakin-an han Efraim, ngan tinabok hira ngadto ha Zapon* ngan nagsiring kan Jefte: “Kay ano nga waray mo kami tawaga basi umupod ha imo han tinabok ka basi makiggirra ha mga Ammonita?+ Susunugon namon an imo balay upod ka.”
2 Kondi hi Jefte nagsiring ha ira: “Upod an akon katawohan, inatubang ako hin daku nga pakig-away ha mga Ammonita. Nangaro gud ako hin bulig ha iyo, pero waray niyo ako talwasa tikang ha ira kamot.
3 Han nakita ko nga diri niyo ako tatalwason, nagdesisyon ako nga ibutang ha peligro an akon kinabuhi* ngan makiggirra ha mga Ammonita,+ ngan igintubyan hira ni Jehova ha akon. Salit kay ano nga kinanhi kamo yana nga adlaw basi makiggirra ha akon?”
4 Katapos, gintirok ni Jefte an ngatanan nga kalalakin-an han Gilead,+ ngan nakiggirra hira ha Efraim; napirde han kalalakin-an han Gilead an Efraim, nga nagsiring: “Mga puga la kamo tikang ha Efraim, kamo nga mga Gileadita ha Efraim ngan ha Manases.”
5 Ginbantayan han kalalakin-an han Gilead an mga kahamabwan han Jordan+ ha atubangan han mga Efraimita; ngan kon an kalalakin-an han Efraim nagsasari nga pumalagiw, nasiring hira, “Tuguti ako nga makatabok”; katapos, an kalalakin-an han Gilead napakiana ha tagsa ha ira, “Efraimita ka ba?” Kon nabaton hiya, “Diri!”
6 nasiring hira ha iya, “Pagsiring daw hin Shibolet.” Kondi nasiring hiya, “Sibolet,” kay diri niya naluluwas hin husto an pulong. Katapos ira hiya gindadakop ngan ginpapatay ha mga kahamabwan han Jordan. Salit 42,000 nga Efraimita an nagkamatay hito nga panahon.
7 Hi Jefte naghukom ha Israel ha sulod hin unom ka tuig. Katapos hito hi Jefte nga Gileadita namatay ngan iginlubong ha iya syudad ha Gilead.
8 Katapos niya, hi Ibzan nga taga-Bethlehem naghukom ha Israel.+
9 May-ada hiya 30 nga anak nga lalaki ngan 30 nga anak nga babaye. Iya ginpalakat an iya mga anak nga babaye basi mag-asawa hin mga lalaki ha gawas han iya panimalay, ngan nagdara hiya hin 30 nga babaye basi magin asawa han iya mga anak nga lalaki. Naghukom hiya ha Israel ha sulod hin pito ka tuig.
10 Katapos, hi Ibzan namatay ngan iginlubong ha Bethlehem.
11 Katapos niya, hi Elon nga Zebulonita naghukom ha Israel; naghukom hiya ha Israel ha sulod hin napulo ka tuig.
12 Katapos, hi Elon nga Zebulonita namatay ngan iginlubong ha Aijalon ha tuna han Zebulon.
13 Katapos niya, hi Abdon nga anak nga lalaki ni Hilel nga taga-Piraton naghukom ha Israel.
14 May-ada hiya 40 nga anak nga lalaki ngan 30 nga apo nga lalaki nga nasakay ha 70 nga asno. Naghukom hiya ha Israel ha sulod hin walo ka tuig.
15 Katapos, hi Abdon nga anak nga lalaki ni Hilel nga taga-Piraton namatay ngan iginlubong ha Piraton ha tuna han Efraim ha bukid han Amalekita.+
Mga footnote
^ O posible nga “tinabok hira tipanorte.”
^ O “iginbutang ko an akon kalag ha akon kamot.”
