Mga Hukom 17:1-13
-
Idolo ngan saserdote ni Micas (1-13)
17 May lalaki tikang ha kabukiran han Efraim+ nga Micas an ngaran.
2 Nagsiring hiya ha iya nanay: “An 1,100 ka bug-os nga silber nga ginkuha ha imo nga tungod hito iginsumpa mo an nagkawat, ngan nabatian ko ito—kitaa! aadi ha akon an silber. Ako an nagkuha hito.” Salit an iya nanay nagsiring: “Hinaot bendisyonan ni Jehova an akon anak.”
3 Salit iya iginbalik ha iya nanay an 1,100 ka bug-os nga silber, kondi an iya nanay nagsiring: “Babaraanon ko gud para kan Jehova an silber tikang ha akon kamot basi magamit han akon anak ha paghimo hin inukit nga imahen ngan hin metal nga rebulto.*+ Yana ibabalik ko ito ha imo.”
4 Katapos niya ibalik ha iya nanay an silber, an iya nanay nagkuha hin 200 ka bug-os nga silber ngan iginhatag ito ha platero hin silber. Naghimo an platero hin silber hin inukit nga imahen ngan hin metal nga rebulto;* ngan iginbutang ito ha balay ni Micas.
5 Ini nga Micas may balay han mga dios, ngan naghimo hiya hin epod+ ngan hin terapim nga mga rebulto*+ ngan iginbutang ha katungdanan an* usa han iya mga anak nga lalaki basi magin saserdote para ha iya.+
6 Hito nga mga adlaw, waray hadi ha Israel.+ An kada tagsa nagbubuhat han husto ha iya kalugaringon nga pagkita.*+
7 Yana may batan-on nga lalaki nga taga-Bethlehem+ ha Juda nga tikang ha pamilya ni Juda. Usa hiya nga Levita+ nga naukoy didto hin pipira na ka panahon.
8 An lalaki binaya ha syudad han Bethlehem ha Juda basi mamiling hin lugar nga mauukyan. Samtang nagbibiyahe hiya, nakaabot hiya ha kabukiran han Efraim, ha balay ni Micas.+
9 Katapos, hi Micas nagsiring ha iya: “Diin ka tikang?” Hiya binaton: “Usa ako nga Levita tikang ha Bethlehem ha Juda, ngan nagbibiyahe ako basi mamiling hin lugar nga mauukyan.”
10 Salit hi Micas nagsiring ha iya: “Ukoy dinhi ha akon ngan magin amay* ka ngan saserdote para ha akon. Tatagan ko ikaw hin napulo ka bug-os nga silber kada tuig ngan hin liwanan nga mga bado ngan hin imo pagkaon.” Salit sinulod an Levita.
11 Tungod hito an Levita inuyon nga umukoy kaupod ni Micas, ngan ini nga batan-on nga lalaki nagin sugad hin usa han iya mga anak nga lalaki.
12 Dugang pa, iginbutang ni Micas ha katungdanan an* Levita basi magin saserdote para ha iya,+ ngan inukoy hiya ha balay ni Micas.
13 Katapos, hi Micas nagsiring: “Yana maaram ako nga hi Jehova magigin maopay ha akon, kay an Levita nagin saserdote ko.”
Mga footnote
^ O “hinurma nga rebulto.”
^ O “hinurma nga rebulto.”
^ Lit., “ginpuno an kamot han.”
^ O “mga dios han panimalay; mga idolo.”
^ O “han iya ginhuhunahuna nga husto.”
^ O “magsaragdon.”
^ Lit., “ginpuno ni Micas an kamot han.”
