Mga Hukom 20:1-48
-
Pakiggirra ha Benjamin (1-48)
20 Salit an ngatanan nga Israelita nagkagawas tikang ha Dan+ tubtob ha Beer-sheba ngan tikang ha tuna han Gilead,+ ngan an bug-os nga komunidad nagtirirok nga urosa* ha atubangan ni Jehova ha Mizpa.+
2 Salit an mga lider han katawohan ngan an ngatanan nga tribo han Israel nanindog ha kongregasyon han katawohan han Dios—400,000 nga nagbabaktas nga sundalo nga armado hin mga espada.+
3 An mga Benjaminita nakabati nga an kalalakin-an han Israel sinagka ha Mizpa.
Katapos, an kalalakin-an han Israel nagsiring: “Sumati kami, paonan-o nahitabo inin maraot gud nga butang?”+
4 Salit an Levita nga lalaki,+ an bana han babaye nga ginpatay, binaton: “Kinadto ako ha Gibeah+ han Benjamin upod an akon babaye basi magpalabay han gab-i didto.
5 Ngan pagkagab-i an mga umurukoy* han Gibeah binuhát kontra ha akon ngan ginpalibotan an balay. Karuyag nira ako patayon, pero ginlugos lugod nira an akon babaye, ngan namatay hiya.+
6 Salit ginkuha ko an lawas han akon babaye ngan gin-utod-utod ito ngan iginpadara ha tagsa nga bahin han panurundon han Israel,+ kay nagbuhat hira hin makaarawod ngan mangil-ad nga buhat ha Israel.
7 Yana kamo ngatanan nga katawohan han Israel, pagsuhestyon kamo han sadang buhaton+ may kalabotan hini.”
8 Katapos, an ngatanan nga katawohan binuhát nga urosa* ngan nagsiring: “Waray bisan usa ha aton nga makadto ha iya tolda o mabalik ha iya balay.
9 Yana ini an aton bubuhaton ha Gibeah: Magriripa kita ngan masagka basi sulungon ito.+
10 Tikang ha ngatanan nga tribo han Israel makuha kita hin 10 nga lalaki ha kada 100, ngan hin 100 ha kada 1,000 ngan hin 1,000 ha kada 10,000 basi mangulekta hin pagkaon para ha kasundalohan, basi gumios hira kontra ha Gibeah han Benjamin, tungod han mangil-ad nga ira ginbuhat ha Israel.”
11 Salit an ngatanan nga kalalakin-an han Israel gintirok nga urosa* kontra ha syudad sugad nga mga magkaalyado.
12 Katapos, an mga tribo han Israel nagsugo hin kalalakin-an ngadto ha ngatanan nga tawo ha tribo ni Benjamin, nga nasiring: “Ano inin maraot gud nga butang nga nahitabo dida ha iyo?
13 Yana itubyan an waray pulos nga kalalakin-an tikang ha Gibeah,+ basi mapatay namon hira ngan makuha an karaotan tikang ha Israel.”+ Kondi an mga Benjaminita nadiri pagpamati ha ira kabugtoan nga mga Israelita.
14 Katapos, an mga Benjaminita nagtirirok tikang ha mga syudad ngadto ha Gibeah basi gumawas ngan makiggirra ha kalalakin-an han Israel.
15 Hito nga adlaw an mga Benjaminita nagpatawag tikang ha ira mga syudad hin 26,000 nga lalaki nga armado hin mga espada, labot han 700 nga pinili nga kalalakin-an han Gibeah.
16 Hini nga kasundalohan may 700 nga pinili nga lalaki nga walhon. An tagsa ha ira asintado maglabyog hin bato ha puntirya nga sugad kanipis han grano han buhok ngan diri napaltos.
17 An kalalakin-an han Israel, labot la han Benjamin, nagpatawag hin 400,000 nga lalaki nga armado hin mga espada,+ ngan an tagsa ha ira eksperyensyado nga girriro.
18 Binuhát hira ngan sinagka ha Bethel basi magpakiana ha Dios.+ Katapos, an katawohan han Israel nagsiring: “Hin-o ha amon an sadang manguna ha pagsagka basi makiggirra ha mga Benjaminita?” Hi Jehova binaton: “An Juda an mangunguna.”
19 Katapos hito an mga Israelita binuhát ha aga ngan nagkampo basi makiggirra ha Gibeah.
20 Yana an kalalakin-an han Israel nagkagawas basi makiggirra ha Benjamin; pinwesto hira basi makiggirra ha ira ha Gibeah.
21 Salit an mga Benjaminita nagkagawas tikang ha Gibeah ngan nagpatay hin 22,000 nga kalalakin-an han Israel hito nga adlaw.
22 Kondi an kasundalohan han kalalakin-an han Israel nagpakita hin kaisog ngan pinwesto utro basi makiggirra ha lugar nga ira ginpwestohan han siyahan nga adlaw.
23 Katapos, an mga Israelita sinagka ngan nanangis ha atubangan ni Jehova tubtob ha pagsirom ngan nagpakiana kan Jehova: “Sadang ba kami makiggirra utro ha amon kabugtoan, an katawohan han Benjamin?”+ Hi Jehova binaton: “Sagka kamo ngan pakiggirra ha ira.”
24 Salit an mga Israelita hinirani ha mga Benjaminita han ikaduha ka adlaw.
25 An Benjamin ginawas liwat tikang ha Gibeah basi tapoon hira han ikaduha ka adlaw ngan ginpamatay an 18,000 pa nga Israelita,+ ngatanan armado hin mga espada.
26 Tungod hito an ngatanan nga kalalakin-an han Israel sinagka ha Bethel. Nanangis hira ngan nanlingkod didto ha atubangan ni Jehova,+ ngan hito nga adlaw nagpuasa+ hira tubtob ha pagsirom ngan naghalad ha atubangan ni Jehova hin mga halad nga sinunog+ ngan mga halad nga ginsasarosaroan.+
27 Katapos hito an kalalakin-an han Israel nagpakiana kan Jehova,+ kay hito nga mga adlaw nakadto an arka han kasabotan han tinuod nga Dios.
28 Hito nga mga adlaw hi Pinehas+ nga anak nga lalaki ni Eleazar, nga anak nga lalaki ni Aaron, nag-aalagad* ha atubangan hito. Nagpakiana hira: “Sadang pa ba kami gumawas utro basi makiggirra ha amon kabugtoan, an kalalakin-an han Benjamin, o sadang na kami umundang?”+ Hi Jehova binaton: “Sagka kamo, kay buwas ihahatag ko hira ha iyo kamot.”
29 Katapos, an Israel nagsugo hin kalalakin-an nga mag-aambus+ ngan ginpatago hira ha palibot han Gibeah.
30 Han ikatulo ka adlaw an mga Israelita sinagka basi makiggirra ha mga Benjaminita, ngan pinwesto hira basi makiggirra ha Gibeah pariho han nahiuna nga mga higayon.+
31 Han ginawas an mga Benjaminita basi tapoon an kasundalohan, napahirayo hira ha syudad.+ Katapos, pariho han nahiuna nga mga higayon, nagtikang hira pag-atake ngan pagpamatay ha pipira han kalalakin-an didto ha mga kalsada, nga an usa tipasagka ha Bethel ngan an usa pa tipasagka ha Gibeah, salit mga 30 nga kalalakin-an han Israel an namatay didto.+
32 Salit an mga Benjaminita nagsiring: “Napipirde na liwat hira ha atubangan naton pariho hadto.”+ Kondi an mga Israelita nagsiring: “Maatras kita ngan ipapahirayo hira tikang ha syudad tipakadto ha mga kalsada.”
33 Salit an ngatanan nga kalalakin-an han Israel binuhát tikang ha ira hinmumutangan ngan pinwesto basi makiggirra didto ha Baal-tamar samtang an mag-aambus nga mga Israelita madagmit nga nagkakagawas ha ira gintatagoan hirani ha Gibeah.
34 Salit 10,000 nga pinili nga lalaki tikang ha bug-os nga Israel an kinadto ha atubangan han Gibeah, ngan duro gud an araway. Kondi an mga Benjaminita diri maaram nga hirani na umabot ha ira an kadaot.
35 Ginpirde ni Jehova an Benjamin+ ha atubangan han Israel, ngan hito nga adlaw an mga Israelita nagpatay hin 25,100 nga kalalakin-an han Benjamin, ngatanan armado hin mga espada.+
36 Kondi kahuna han mga Benjaminita nga an kalalakin-an han Israel mapipirde han inatras hira tikang ha Benjamin,+ pero inatras hira kay nasarig hira ha mga ginsugo nga mag-ambus ha Gibeah.+
37 An mga mag-aambus ginios dayon ngan nagdagmit pagkadto ha Gibeah. Katapos, an mga mag-aambus nagburublag ha bug-os nga syudad ngan ginpamatay pinaagi han espada an ngatanan nga umurukoy hito.
38 Yana ginkasarabotan han kalalakin-an han Israel nga an kalalakin-an nga mag-aambus ha mga umurukoy han syudad magpapagawas hin aso nga magtitipaigbaw tikang didto sugad nga sinyales.
39 Han an mga Israelita inatras tikang ha pakiggirra, an kalalakin-an han Benjamin nagtikang pag-atake ngan pagpamatay hin mga 30 nga kalalakin-an han Israel,+ ngan nagsiring hira: “Napipirde na liwat hira ha atubangan naton, pariho han nahiuna nga girra.”+
40 Kondi an madakmol nga aso tikang ha syudad nagtikang pagtipaigbaw sugad nga sinyales. Han an kalalakin-an han Benjamin liningi basi magkita, ira nakita nga an aso han bug-os nga syudad nagtitipaigbaw ha langit.
41 Katapos, binwelta an kalalakin-an han Israel, ngan naalarma an kalalakin-an han Benjamin, kay nakita nira nga inabot ha ira an kadaot.
42 Salit inatras hira tikang ha kalalakin-an han Israel tipakadto ha kamingawan. Kondi ginlanat hira han kalalakin-an han Israel, ngan an kalalakin-an nga nagkagawas tikang ha mga syudad inapi ha pagpamatay ha ira.
43 Ira ginpalibotan an mga Benjaminita ngan waray umundang ha paglanat ha ira. Gintamak-tamakan nira hira ha atubangan mismo han Gibeah, ha este hito.
44 Ha kataposan, 18,000 nga kalalakin-an han Benjamin an nagkamatay, ngatanan magkusog nga girriro.+
45 An kalalakin-an han Benjamin tinalikod ngan pinalagiw ngadto ha daku nga bato han Rimon+ ha kamingawan, ngan ginpamatay han mga Israelita* an 5,000 ha ira ha mga kalsada, ngan padayon nga ginlanat nira hira tubtob ha Gidom; salit 2,000 pa nga lalaki an ira ginpamatay.
46 An ngatanan ha Benjamin nga nagkamatay hito nga adlaw inabot hin 25,000 nga lalaki nga armado hin mga espada,+ ngatanan magkusog nga girriro.
47 Kondi 600 an namalagiw ngadto ha daku nga bato han Rimon ha kamingawan, ngan nagpabilin hira ha daku nga bato han Rimon ha sulod hin upat ka bulan.
48 Ngan an kalalakin-an han Israel binalik kontra ha mga Benjaminita ngan ginpamatay pinaagi han espada an mga naukoy ha mga syudad, tikang ha mga tawo ngadto ha inataman nga mga hayop, an ngatanan nga nahisalin. Ira liwat ginpansunog ha kalayo an ngatanan nga syudad nga ira gin-agian.
Mga footnote
^ Lit., “sugad nga usa ka tawo.”
^ O posible nga “mga tag-iya han tuna.”
^ Lit., “sugad nga usa ka tawo.”
^ Lit., “sugad nga usa ka tawo.”
^ Lit., “natindog.”
^ Lit., “gin-ubos nira.”
