Mga Hukom 7:1-25
7 Katapos hi Jerubaal, karuyag sidngon, hi Gideon,+ ngan an ngatanan nga katawohan nga kaupod niya binuhát hin temprano ngan nagkampo hirani ha Burabod han Harod, ngan an kampo han Midian nahimumutang ha norte niya hirani ha bungtod han More ha kapatagan.*
2 Yana hi Jehova nagsiring kan Gideon: “Sobra kadamu an katawohan nga kaupod mo para ihatag ko an Midian ha ira kamot.+ Kon buhaton ko ito, bangin ighambog han Israel an iya kalugaringon ngan magsiring, ‘Gintalwas ako han akon kalugaringon nga kamot.’+
3 Yana, alayon, ipahibaro ha atubangan han katawohan: ‘An bisan hin-o nga nahahadlok ngan nangungurog, makakauli na hiya.’”+ Salit ginsarihan hira ni Gideon. Tungod hito, 22,000 han katawohan an inuli, ngan 10,000 an nagpabilin.
4 Kondi hi Jehova nagsiring kan Gideon: “Sobra kadamu la gihapon an katawohan. Palugsara hira ngadto ha tubig basi masarihan ko hira didto para ha imo. Kon magsiring ako ha imo, ‘Ini hiya maupod ha imo,’ hiya maupod ha imo, kondi kon magsiring ako ha imo, ‘Ini hiya diri maupod ha imo,’ diri hiya maupod.”
5 Salit iya ginpalugsad ngadto ha tubig an katawohan.
Katapos hi Jehova nagsiring kan Gideon: “An kada tagsa nga naglalaklak han tubig pinaagi han iya dila sugad han paglaklak han ayam ibulag ha mga naluhod basi uminom.”
6 An kadamu han mga naglalaklak han tubig, nga iginbubutang an ira kamot ha ira baba, 300 nga lalaki. An iba pa nga katawohan linuhod basi uminom.
7 Katapos hito, hi Jehova nagsiring kan Gideon: “Tatalwason ko kamo pinaagi han 300 nga lalaki nga naglaklak han tubig, ngan ihahatag ko an Midian ha imo kamot.+ Kondi pabay-i an iba pa nga katawohan nga manguli.”
8 Salit katapos nira kuhaon ha katawohan an mga suplay nga pagkaon ngan an mga sungay, iya ginpauli an iba pa nga kalalakin-an han Israel, ngan an 300 nga lalaki la an iya ginpabilin. An kampo han Midian nahimumutang ha kapatagan ha ubos niya.+
9 Hito nga gab-i, hi Jehova nagsiring ha iya: “Buhát, sulonga an kampo, kay iginhatag ko na ito ha imo kamot.+
10 Pero kon nahahadlok ka pagsulong, lugsad ngadto ha kampo kaupod hi Pura nga imo kabulig.
11 Pamatii an ira gin-iistoryahan, ngan katapos hito magkakaada ka kaisog* ha pagsulong ha kampo.” Salit hiya ngan hi Pura nga iya kabulig linugsad hirani ha nagkakampo nga kasundalohan.
12 Yana an Midian ngan Amalek ngan an ngatanan nga taga-Este+ naglukop han kapatagan pariho hin panon han mga duron, ngan an ira mga kamelyo diri maihap,+ sugad kadamu han mga baras ha baybayon.
13 Yana inabot hi Gideon, ngan may lalaki nga nag-iistorya hin inop ngadto ha iya kaupod, ngan hiya nagsiring: “Ini an akon inop. May malidong nga tinapay nga sebada nga nagkakaliding tipasulod ha kampo han Midian. Nakaabot ito ha usa nga tolda ngan nabunggo hin makusog gud an tolda salit naruspak ini.+ Oo, nabaliskad hito an tolda, ngan narumpag an tolda.”
14 Ngan an iya kaupod nagsiring: “An espada gud ini ni Gideon+ nga anak ni Joas, usa nga lalaki nga Israelita. Iginhatag na han Dios ha iya kamot an Midian ngan an bug-os nga kampo.”+
15 Pakabati gud ni Gideon han iya pag-istorya han inop ngan han kahulogan hito,+ yinukbo hiya basi magsingba. Katapos hito binalik hiya ha kampo han Israel ngan nagsiring: “Buhát, kay iginhatag na ni Jehova ha iyo kamot an kampo han Midian.”
16 Katapos, iya ginbahin-bahin an 300 nga lalaki ngadto ha tulo ka grupo ngan gintagan hira ngatanan hin mga sungay+ ngan hin mga tadyaw nga may mga sulô ha sulod.
17 Katapos, nagsiring hiya ha ira: “Kitaa ako ngan buhata kon ano gud an akon ginbubuhat. Pag-abot ko ha ligid han kampo, kinahanglan niyo buhaton an akon ginbubuhat.
18 Kon huypan ko na an sungay, ako ngan an ngatanan nga kaupod ko, kinahanglan liwat niyo huypan an mga sungay ha palibot han kampo ngan guliat kamo, ‘Para kan Jehova ngan para kan Gideon!’”
19 Hi Gideon ngan an 100 nga lalaki nga kaupod niya inabot ha ligid han kampo ha tinikangan han ikaduha nga pagbantay ha gab-i,* katapos gud la papwestuhon an mga gwardya. Ira ginhuypan an mga sungay+ ngan ginpanbuong an mga tadyaw han tubig nga ira ginkakaptan.+
20 Salit ginhuypan han tulo nga grupo an mga sungay ngan ginpanbuong an mga tadyaw. Ira ginkaptan an mga sulô ha ira wala nga kamot ngan ginhuypan an mga sungay ha ira too nga kamot ngan nagsinggit hira: “An espada ni Jehova ngan ni Gideon!”
21 Hiton bug-os nga panahon, an tagsa nga lalaki natindog ha iya pwesto ha palibot han kampo, ngan an ngatanan nga kasundalohan nandadlagan, nga nan-gugugliat samtang namamalagiw.+
22 Padayon nga ginhuypan han 300 an mga sungay, ngan ginpahinabo ni Jehova nga an kada tagsa ha bug-os nga kampo magparaptayay pinaagi han espada;+ ngan an kasundalohan pinalagiw tubtob ha Bet-sita, ngadto ha Zerera, tubtob ha giutan han Abel-mehola+ hirani ha Tabat.
23 Ngan an kalalakin-an han Israel gintirok tikang ha Neptali, ha Aser, ngan ha bug-os nga Manases,+ ngan ira ginlanat an Midian.
24 Hi Gideon nagsugo hin mga mensahero ngadto ha ngatanan nga kabukiran han Efraim, nga nasiring: “Lugsad kamo basi sulungon an Midian, ngan bantayi an mga aragian tipakadto ha katubigan tubtob ha Bet-bara ngan ha Jordan.” Salit gintirok an ngatanan nga kalalakin-an han Efraim, ngan ira ginbantayan an katubigan tubtob ha Bet-bara ngan ha Jordan.
25 Ira liwat ginbihag an duha nga prinsipe han Midian nga hira Oreb ngan Zeeb; ira ginpatay hi Oreb ha bato ni Oreb,+ ngan ira ginpatay hi Zeeb ha purog-an nga panbino ni Zeeb. Padayon nira nga ginlanat an Midian,+ ngan an mga ulo nira Oreb ngan Zeeb ira gindara kan Gideon ha rehiyon han Jordan.
Mga footnote
^ O “hamubo nga kapatagan.”
^ Lit., “an imo mga kamot magigin makusog.”
^ Tikang ha mga alas-10 han gab-i tubtob ha mga alas-2 han maagahon.
