Isaias 32:1-20
32 Kitaa! An usa nga hadi+ magmamando para ha katadongan,+Ngan an mga prinsipe magmamando para ha hustisya.
2 Ngan an kada tagsa magigin sugad hin taragoan* tikang ha hangin,Usa nga sirongan* tikang ha makusog nga uran,Sugad hin mga sapa ha tuna nga waray tubig,+Sugad han lambong han daku gud nga bato ha uga nga tuna.
3 Katapos, an mga mata han mga nakakakita diri na pipiyungon,Ngan an mga talinga han mga nakakabati mamamati hin maopay.
4 An kasingkasing han mga nagios nga diri anay naghuhunahuna mamumurubuot han kahibaro,Ngan an utal-utal nga dila magigin maopay ngan klaro magyakan.+
5 An lurong nga tawo diri na tatawagon nga mahinatagon,Ngan an tawo nga waray prinsipyo diri tatawagon nga dungganon;
6 Kay an lurong nga tawo magyayakan hin linurong,Ngan an iya kasingkasing magpaplano hin nakakadaot nga mga butang,+Basi magbuhat hin apostasya* ngan magyakan hin mga buwa kontra kan Jehova,Basi diri pakaunon an tawo nga ginugutom*Ngan basi diri tagan hin maiinom an tawo nga gin-uuhaw.
7 Maraot an mga pamaagi han tawo nga waray prinsipyo;+Nagpaplano hiya hin makaarawod nga paggawiBasi dauton pinaagi hin mga buwa an tawo nga nag-aantos,+Bisan kon an pobre nagyayakan hin husto.
8 Kondi an mahinatagon nga tawo may mahinatagon nga mga intensyon,Ngan nagpapadayon hiya ha pagin mahinatagon.*
9 “Kamo nga kampante nga kababayin-an, buhát ngan pamati ha akon tingog!
Kamo nga mga anak nga babaye nga waray pagtagad,+ paghatag hin atensyon ha akon isisiring!
10 Sobra la hin gutiay ha usa ka tuig, mahahadlok kamo nga mga waray pagtagad,Kay waray bunga nga matitirok ha panahon nga matapos an pangani han mga ubas.+
11 Pangurog, kamo nga kampante nga kababayin-an!
Kahadlok, kamo nga mga waray pagtagad!
Huboa an iyo bado,Ngan pagsul-ot hin sako nga panapton ha iyo mga baliatang.+
12 Pukpoka an iyo dughan tungod han duro nga kasuboHa nahitabo ha makaruruyag nga kaumhan ngan ha mabungahon nga mga urubasan.
13 Kay an tuna han akon katawohan mapupuno hin tunukon nga mga tanom;Matatabonan hito an ngatanan nga balay nga may pagrayhak,Oo, an syudad nga duro an kalipay.+
14 Kay an marig-on nga torre ginpabay-an na;An maaringasa nga syudad ginbayaan na.+
An Ofel+ ngan an torre nga taran-awan padayon nga nagin binayaan nga lugar,Nga makalilipay para ha ihalas nga mga asno,Ngan usa nga panabsaban para ha mga panon,+
15 Tubtob nga ibubo ha aton an espiritu tikang ha kahitas-an,+Ngan an kamingawan magin lugar han namumunga nga kakahoyan,Ngan an lugar han namumunga nga kakahoyan tagdon nga kagurangan.+
16 Hito nga panahon an hustisya maukoy ha kamingawan,Ngan an katadongan maukoy ha lugar han namumunga nga kakahoyan.+
17 An tinuod nga katadongan magriresulta hin kamurayawan,+Ngan an tinuod nga katadongan magbubunga hin nagpapadayon nga kamurayawan ngan kasigurohan.+
18 An akon katawohan maukoy ha murayaw nga urukyan,Ha talwas nga mga urukyan ngan ha murayaw nga mga pahuwayan.+
19 Kondi gugub-on han uran nga yelo an kagurangan,Ngan an syudad magigin patag gud.
20 Malipayon kamo nga nagsasabwag hin binhi ha ligid han ngatanan nga katubigan,Kamo nga ginpapagawas* an todo nga baka ngan an asno.”+
Mga footnote
^ O “luruk-an.”
^ O “arayopan.”
^ O “gumios hin waray respeto.”
^ O “an kalag han tawo nga ginugutom.”
^ O “ha dungganon nga mga buhat.”
^ O “ginbubuhian.”
