Jeremias 26:1-24
26 Ha tinikangan han paghadi ni Jehoiakim+ nga anak nga lalaki ni Josias, nga hadi han Juda, inabot ini nga pulong tikang kan Jehova:
2 “Ini an siring ni Jehova, ‘Tindog ha bungsaran han balay ni Jehova ngan pagyakan mahitungod* ha ngatanan nga katawohan han mga syudad han Juda nga nagkakaabot basi magsingba* ha balay ni Jehova. Isumat ha ira an ngatanan nga akon isusugo ha imo; ayaw pag-iban hin pulong.
3 Bangin man la mamati hira ngan bayaan han tagsa ha ira an iya maraot nga panggawi, ngan babag-uhon ko an akon hunahuna mahitungod* han kabungkagan nga akon ginhuhunahuna nga ipadapat ha ira tungod han ira magraot nga mga binuhatan.+
4 Sidnga hira: “Ini an siring ni Jehova, ‘Kon diri kamo mamati ha akon pinaagi ha pagsunod ha akon balaud* nga akon iginhatag ha iyo,
5 pinaagi ha pagpamati ha mga pulong han akon mga surugoon nga mga propeta, nga akon ginsusugo ha iyo hin pauroutro,* nga diri niyo ginpapamatian,+
6 ini nga balay hihimoon ko nga pariho han Shilo,+ ngan ini nga syudad hihimoon ko nga lugar nga igsusumpa han ngatanan nga nasud ha tuna.’”’”+
7 Ngan an mga saserdote, an mga propeta, ngan an ngatanan nga katawohan nakabati nga ginyayakan ni Jeremias ini nga mga pulong ha balay ni Jehova.+
8 Salit katapos ni Jeremias igyakan an ngatanan nga iginsugo ha iya ni Jehova nga igyakan ha ngatanan nga katawohan, gindakop hiya han mga saserdote, han mga propeta, ngan han ngatanan nga katawohan ngan ginsidngan: “Sigurado nga mamamatay ka.
9 Kay ano nga nananagna ka ha ngaran ni Jehova, nga nasiring, ‘Ini nga balay magigin pariho han Shilo, ngan ini nga syudad bubungkagon ngan mawawad-an hin umurukoy’?” Ngan ginpalibotan han ngatanan nga katawohan hi Jeremias didto ha balay ni Jehova.
10 Han nabatian han mga prinsipe han Juda ini nga mga pulong, tikang ha balay* han hadi kinadto hira ha balay ni Jehova ngan liningkod ha aragian tipasulod ha bag-o nga ganghaan ni Jehova.+
11 An mga saserdote ngan an mga propeta nagsiring ha mga prinsipe ngan ha ngatanan nga katawohan: “Ini nga tawo angay sirotan hin kamatayon,+ kay nanagna hiya kontra hini nga syudad sugad la han hinbatian han iyo mismo mga talinga.”+
12 Katapos, hi Jeremias nagsiring ha ngatanan nga prinsipe ngan ha ngatanan nga katawohan: “Hi Jehova an nagsugo ha akon nga igtagna kontra hini nga balay ngan kontra hini nga syudad an ngatanan nga pulong nga iyo hinbatian.+
13 Salit yana, bag-oha an iyo mga panggawi ngan an iyo mga binuhatan ngan sugta hi Jehova nga iyo Dios, ngan hi Jehova magbabag-o han iya hunahuna mahitungod* han kabungkagan nga iya iginyakan kontra ha iyo.+
14 Kondi mahitungod ha akon, aada ako ha iyo kamot. Buhata ha akon an anoman nga baga hin maopay ngan husto ha iyo pagkita.
15 Basta hibaroi la niyo nga kon patayon niyo ako, kamo ngan ini nga syudad ngan an mga naukoy dinhi magkakaada baratunon tungod han inosente nga dugo, kay ha pagkamatuod ginsugo ako ni Jehova nganhi ha iyo basi igyakan ha iyo atubangan ini ngatanan nga pulong.”
16 Katapos, an mga prinsipe ngan an ngatanan nga katawohan nagsiring ha mga saserdote ngan ha mga propeta: “Ini nga tawo diri angay sirotan hin kamatayon, kay nagyakan hiya ha aton ha ngaran ni Jehova nga aton Dios.”
17 Dugang pa, an pipira han mga tigurang han tuna binuhát ngan nagsiring ha bug-os nga kongregasyon han katawohan:
18 “Hi Micas+ nga taga-Moreset nananagna ha mga adlaw ni Hadi Hezekias+ han Juda, ngan nagsiring hiya ha ngatanan nga katawohan han Juda, ‘Ini an siring ni Jehova han mga hugpo:
“An Zion aaraduhon pariho hin uma,An Jerusalem magigin mga tambak han kagubaan,+Ngan an bukid han Balay* magigin pariho hin higtaas nga mga lugar ha kagurangan.”’*+
19 “Ginpatay ba hiya ni Hadi Hezekias han Juda ngan han bug-os nga Juda? Waray ba mahadlok an hadi kan Jehova ngan makimalooy para han pag-uyon ni Jehova,* nga tungod hito hi Jehova nagbag-o han iya hunahuna mahitungod* han kabungkagan nga iya iginyakan kontra ha ira?+ Salit magdadara kita hin daku nga kadaot ha aton kalugaringon.*
20 “Ngan may-ada pa usa nga tawo nga nananagna ha ngaran ni Jehova, hi Urias nga anak nga lalaki ni Semaias nga tikang ha Kiriat-jearim,+ nga nanagna kontra hini nga syudad ngan kontra hini nga tuna gamit an mga pulong nga pariho han kan Jeremias.
21 An iya mga pulong hinbatian ni Hadi Jehoiakim+ ngan han ngatanan niya nga magkusog nga kalalakin-an ngan han ngatanan nga prinsipe, ngan gin-ikaparatay hiya han hadi.+ Pakabati gud hito ni Urias, nahadlok hiya ngan pinalagiw ngadto ha Ehipto.
22 Katapos, ginsugo ni Hadi Jehoiakim ngadto ha Ehipto hi Elnathan+ nga anak nga lalaki ni Acbor ngan an iba pa nga kalalakin-an nga kaupod niya.
23 Ira ginkuha hi Urias ha Ehipto ngan gindara kan Hadi Jehoiakim; ginpatay hiya han hadi pinaagi han espada+ ngan iginlabog an iya patay nga lawas ha lubnganan han ordinaryo nga mga tawo.”
24 Kondi hi Ahikam+ nga anak nga lalaki ni Safan+ binulig kan Jeremias, salit waray hiya itubyan ha katawohan basi patayon.+
Mga footnote
^ O “ngadto.”
^ O “magyukbo.”
^ O “magbabasol ako tungod.”
^ O “instruksyon.”
^ Lit., “nga nabuhát hin temprano ngan ginsusugo hira.”
^ O “palasyo.”
^ O “magbabasol tungod.”
^ O “bungtod nga hinmumutangan han templo.”
^ O “pariho hin bungtod nga damu an kahoy.”
^ O “nagbasol tungod.”
^ O “aton kalag.”
^ O “mangalimbasog nga mapahumok an nawong ni Jehova.”
