Jeremias 42:1-22
42 Katapos, an ngatanan nga lider han kasundalohan, ngan hi Johanan+ nga anak nga lalaki ni Karea, hi Jezanias nga anak nga lalaki ni Hosaias, ngan an ngatanan nga katawohan, tikang ha pinakaubos tubtob ha pinakaprominente, dinaop
2 kan Jeremias nga propeta ngan nagsiring: “Alayon pamatii an amon hangyo, ngan pag-ampo kan Jehova nga imo Dios para ha amon, para hini ngatanan nga nanhibilin, kay pipira na la kami nga nahisalin,+ sugad han imo nakikita.
3 Hinaot isumat ha amon ni Jehova nga imo Dios an dalan nga sadang namon laktan ngan kon ano an sadang namon buhaton.”
4 Hi Jeremias nga propeta binaton ha ira: “Hinbatian ko kamo, ngan mag-aampo ako kan Jehova nga iyo Dios uyon ha iyo hangyo; ngan an tagsa nga pulong nga ibabaton ha iyo ni Jehova, isusumat ko ha iyo. Diri ako magtatago ha iyo hin bisan usa nga pulong.”
5 Binaton hira kan Jeremias: “Hinaot hi Jehova magin tinuod ngan matinumanon nga testigo kontra ha amon kon diri namon buhaton hin eksakto an iginsusugo ha amon ni Jehova nga imo Dios pinaagi ha imo.
6 Maopay man o maraot, susugton namon hi Jehova nga amon Dios, nga ha iya ginsusugo ka namon, basi maghingaopay kami kay ginsusugot namon hi Jehova nga amon Dios.”
7 Paglabay hin napulo ka adlaw an pulong ni Jehova inabot kan Jeremias.
8 Salit iginpatawag niya hi Johanan nga anak ni Karea ngan an ngatanan nga lider han kasundalohan nga kaupod niya ngan an ngatanan nga katawohan, tikang ha pinakaubos tubtob ha pinakaprominente.+
9 Nagsiring hiya ha ira: “Ini an siring ni Jehova nga Dios han Israel, nga ha iya ginsugo niyo ako basi isumat ha iya atubangan an iyo paghangyo hin kalooy:
10 ‘Kon magpapabilin gud kamo hini nga tuna, tutukuron ko kamo ngan diri rurub-on, ngan itatanom ko kamo ngan diri gagabuton, kay magbabasol* ako tungod han kadaot nga akon ginpahinabo ha iyo.+
11 Ayaw kamo kahadlok tungod han hadi han Babilonya, nga iyo ginkakahadlokan.’+
“‘Ayaw kamo kahadlok tungod ha iya,’ nasiring hi Jehova, ‘kay kaupod niyo ako, basi talwason ngan salbaron kamo tikang ha iya kamot.
12 Ngan magpapakita ako hin kalooy ha iyo,+ ngan malolooy hiya ha iyo ngan ibabalik kamo ha iyo kalugaringon nga tuna.
13 “‘Kondi kon sumiring kamo, “Diri, diri kami magpapabilin hini nga tuna!” ngan diri niyo sugton hi Jehova nga iyo Dios
14 pinaagi ha pagsiring, “Diri, makadto lugod kami ha tuna han Ehipto,+ diin diri kami makakakita hin girra o makakabati hin tunog han sungay o magugutom hin tinapay; didto kami maukoy,”
15 yana pamatii niyo an pulong ni Jehova, O nanhibilin han Juda. Ini an siring ni Jehova han mga hugpo, an Dios han Israel: “Kon determinado gud kamo nga kumadto ha Ehipto ngan kumadto kamo didto basi umukoy,*
16 maaabtan kamo didto ha tuna han Ehipto han espada nga iyo ginkakahadlokan, ngan susundan kamo ha Ehipto han gutom nga iyo ginkakahadlokan, ngan didto kamo mamamatay.+
17 Ngan an ngatanan nga tawo nga determinado kumadto ha Ehipto basi umukoy didto mamamatay pinaagi han espada, han gutom, ngan han peste.* Waray bisan usa ha ira an makakatalwas o makakapalagiw ha kabungkagan nga ipapadapat ko ha ira.”’
18 “Kay ini an siring ni Jehova han mga hugpo, an Dios han Israel: ‘Sugad la nga an akon kasina ngan an akon kapungot iginhuwad ha mga naukoy ha Jerusalem,+ an akon kapungot ihuhuwad liwat ha iyo kon kumadto kamo ha Ehipto, ngan igsusumpa kamo, an mga tawo mahahadlok tungod han nahitabo ha iyo, panhihimarauton kamo, ngan tatamayon,+ ngan diri na gud niyo utro makikita ini nga lugar.’
19 “Hi Jehova nagyakan kontra ha iyo, O nanhibilin han Juda. Ayaw kamo pagkadto ha Ehipto. Sadang gud niyo hibaroan nga ginpahamangnoan ko kamo yana
20 nga an iyo sayop magriresulta han kawara han iyo kinabuhi.* Kay ginsugo niyo ako ngadto kan Jehova nga iyo Dios, nga nasiring, ‘Pag-ampo kan Jehova nga amon Dios para ha amon, ngan isumat ha amon an ngatanan nga isisiring ni Jehova nga amon Dios, ngan bubuhaton namon ito.’+
21 Ngan ginsumatan ko kamo yana, pero diri niyo susugton hi Jehova nga iyo Dios o bubuhaton an bisan ano nga iya iginsugo ha akon nga isumat ha iyo.+
22 Salit hibaroi gud niyo nga pinaagi han espada, han gutom, ngan han peste mamamatay kamo ha lugar nga karuyag niyo kadtoan ngan ukyan.”+
