Joel 1:1-20
1 Ini an pulong ni Jehova nga inabot kan Joel* nga anak nga lalaki ni Petuel:
2 “Pamati hini, kamo nga mga tigurang,Ngan paghatag hin atensyon, kamo ngatanan nga umurukoy ha tuna.
May-ada ba sugad hini nga nahitabo ha iyo mga adlaw
O ha mga adlaw han iyo mga kaapoy-apoyan?+
3 Igsumat ito ha iyo mga anak,Ngan ipasumat ito ha iyo mga anak ngadto ha ira mga anak,Ngan han ira mga anak ngadto ha sunod nga henerasyon.
4 An nahisalin han malaksi mangutkot nga mga duron, ginkaon han nagpapanon nga mga duron;+Ngan an nahisalin han panon han mga duron, ginkaon han waray pako nga mga duron;Ngan an nahisalin han waray pako nga mga duron, ginkaon han malamon nga mga duron.+
5 Pagmata, kamo nga mga parahubog,+ ngan pagtangis!
Pagnguyngoy, kamo ngatanan nga parainom hin bino,Kay an matam-is nga bino ginkuha tikang ha iyo mga baba.+
6 Kay usa nga nasud an sinulong ha akon tuna, makusog ngan diri maihap.+
An mga ngipon hito pariho han mga ngipon hin leon,+ ngan an mga panga hito pariho han kanan leon.
7 Gindaot hito an akon tanom nga ubas ngan an akon kahoy nga igos ginhimo nga tuod,Bug-os nga ginpanitan ito ngan ginpanlabog ito,Ginbayaan nga nagbuburusag an gudtiay nga mga sanga hito.
8 Pagnguyngoy sugad hin birhen* nga nakasul-ot hin sako nga panapton
Para ha lalaki nga iya pakakasalan* ha iya pagkabatan-on.
9 Nawad-an hin halad nga tikang ha lugas*+ ngan hin halad nga irimnon+ ha balay ni Jehova;An mga saserdote, an mga surugoon ni Jehova, nabibido.
10 An uma gindaot, an tuna nabibido;+Kay an lugas gindaot, waray na bag-o nga bino, an lana naubos.+
11 An mga parag-uma nababaraka, an mga trabahador ha urubasan nagngunguyngoy,Tungod han trigo ngan han sebada;Kay nagkamatay an mga aranihon ha uma.
12 An tanom nga ubas nauga,An kahoy nga igos nalaya.
An kahoy nga granada, an palma, ngan an mansanas,An ngatanan nga kahoy ha kapatagan nauga;+Kay an kalipay han katawohan nasaliwnan hin kaarawdan.
13 Pagsul-ot hin sako nga panapton* ngan mabido,* kamo nga mga saserdote;Pagnguyngoy, kamo nga mga nagsiserbi ha halaran.+Sulod ngan pagpalabay han gab-i nga nakasul-ot hin sako nga panapton, kamo nga mga surugoon han akon Dios;Kay waray na nagdadara hin halad nga tikang ha lugas+ ngan hin halad nga irimnon+ ngadto ha balay han iyo Dios.
14 Pagpasamwak* hin pagpuasa; ipahibaro nga may espesyal nga katirok.+
Tiroka an mga tigurang, upod an ngatanan nga umurukoy han tuna,Ngadto ha balay ni Jehova nga iyo Dios,+ ngan pangaraba para han bulig ni Jehova.
15 Kairo, tungod hito nga adlaw!
Kay an adlaw ni Jehova hirani na,+Ngan maabot ito pariho hin kabungkagan tikang ha Makagarahum-ha-ngatanan!
16 Diri ba an pagkaon ginkuha tikang ha aton mismo atubangan,Ngan an pagrayhak ngan kalipay tikang ha balay han aton Dios?
17 An mga liso* kinuros ha ilarom han ira mga pala.
An mga bodega ginbayaan.
An mga kamalig ginpan-guba, kay an mga lugas nagkauuga.
18 Bisan an inataman nga mga hayop naghaharoy!
An mga panon han mga baka nagpapatlaag ha kagupong, kay waray hira panabsaban!
Ngan an mga panon han mga karnero nag-aantos han sirot.
19 O Jehova, ha imo matawag ako;+Kay ginlamoy han kalayo an mga panabsaban ha kamingawan,Ngan gin-ugtang han kalayo an ngatanan nga kahoy ha kapatagan.
20 Bisan an ihalas nga mga hayop naghihingyap ha imo,Kay an mga sapa nanhubas
Ngan ginlamoy han kalayo an mga panabsaban ha kamingawan.”
Mga footnote
^ Nangangahulogan nga “Hi Jehova an Dios.”
^ O “batan-on nga babaye.”
^ O “bana.”
^ Lit., “Pagtakgong kamo.”
^ O “pukpoka an iyo dughan.”
^ Lit., “Pagbaraan.”
^ O posible nga “uga nga mga igos.”
