Jonas 3:1-10
3 Katapos, an pulong ni Jehova inabot kan Jonas ha ikaduha nga higayon, nga nasiring:+
2 “Buhát, pakadto ha Nineve+ nga daku nga syudad, ngan ipahayag didto an mensahe nga akon iginsusumat ha imo.”
3 Salit binuhát hi Jonas ngan kinadto ha Nineve+ basi tumanon an ginsiring ni Jehova.+ An Nineve daku hinduro nga syudad*—tulo ka adlaw kon babaktason.
4 Katapos, hi Jonas sinulod ha syudad, ngan nagbinaktas hin usa ka adlaw samtang nagpapasamwak hiya: “Kwarenta ka adlaw na la, bubungkagon na an Nineve.”
5 Ngan an mga tawo ha Nineve tinoo ha Dios,+ ngan nagpasamwak hira hin pagpuasa ngan nagsul-ot hin sako nga panapton, tikang ha pinakaprominente tubtob ha pinakaubos ha ira.
6 Han nakaabot an mensahe ha hadi han Nineve, binuhát hiya ha iya trono ngan ginhukas an iya panhadi nga bado ngan nagsul-ot hin sako nga panapton ngan liningkod ha mga abo.
7 Dugang pa, nagsugo hiya nga ipahibaro ha bug-os nga Nineve,
“Uyon ha sugo han hadi ngan han iya mga opisyal: Waray tawo o hayop, mga baka o mga karnero, nga makaon hin bisan ano. Diri hira makaon, ngan diri liwat hira mainom hin tubig.
8 Magsul-ot hira hin sako nga panapton, an tawo pati an hayop; ngan makimalooy hira ha Dios ngan bayaan an ira magraot nga mga buhat ngan an ira madarahog nga ginbubuhat.
9 Hin-o an maaram kon hunahunaon utro* han tinuod nga Dios an iya karuyag buhaton ngan mawara an iya naglalaga nga kasina, basi diri kita mapoo?”
10 Han nakita han tinuod nga Dios an ira ginbuhat, kon paonan-o nira ginbayaan an ira magraot nga mga buhat,+ iya ginhunahuna utro* an kadaot nga iya ginsiring nga pahihinaboon niya ha ira, ngan waray niya ito igpahinabo.+
