Josue 16:1-10
16 Ngan an tuna nga nakarawat han katulinan ni Jose+ pinaagi han pagripa+ nagtitikang ha Jordan ha may Jerico tipakadto ha katubigan ha este han Jerico, tipakadto ha kamingawan nga tipasagka tikang ha Jerico ngadto ha kabukiran han Bethel.+
2 Tikang ha Bethel nga hirani ha Luz nagpapadayon ito ngadto ha giutan han mga Arkita ha Atarot,
3 katapos nagtitipaubos ito tipa-weste ngadto ha giutan han mga Jafleteo tubtob ha giutan han Ubos nga Bet-horon+ ngan Gezer,+ ngan natatapos ito ha dagat.
4 Salit an katulinan ni Jose,+ an Manases ngan an Efraim, nagtag-iya han ira tuna.+
5 An tubtoban han katulinan ni Efraim uyon ha ira mga pamilya amo an masunod: An tubtoban han ira panurundon ha este amo an Atarot-adar,+ tubtob ha Igbaw nga Bet-horon,+
6 ngan an tubtoban naabot ngadto ha dagat. An Micmetat+ nahimumutang ha norte, ngan an tubtoban naliko tipa-este ngadto ha Taanat-silo, ngan nagpapadayon ito ha este ngadto ha Janoa.
7 Katapos, tikang ha Janoa nagtitipaubos ito ngadto ha Atarot ngan Naara ngan naabot ngadto ha Jerico+ ngan nagpapadayon ngadto ha Jordan.
8 Tikang ha Tapua+ an tubtoban nagpapadayon tipa-weste ngadto ha Walog han Kana, ngan natatapos ito ha dagat.+ Ini an panurundon han tribo ni Efraim uyon ha ira mga pamilya;
9 an katulinan ni Efraim may-ada liwat nahibubulag nga mga syudad ha butnga han panurundon han Manases,+ an ngatanan nga syudad ngan an mga baryo hito.
10 Kondi waray nira paiwasa an mga Canaanita nga naukoy ha Gezer,+ ngan an mga Canaanita nagpapadayon pag-ukoy ha butnga han mga Efraimita tubtob hini nga adlaw+ ngan gin-obligar nga magtrabaho.+
