Josue 17:1-18
17 Katapos, nakarawat han tribo ni Manases+ an ira malon pinaagi han pagripa,+ kay hiya an suhag+ ni Jose. Tungod kay usa nga girriro hi Makir+ nga suhag ni Manases ngan tatay ni Gilead, nakarawat niya an Gilead ngan Basan.+
2 Ngan nakarawat han iba pa nga katulinan ni Manases uyon ha ira mga pamilya an ira malon pinaagi han pagripa, han mga anak nga lalaki ni Abi-ezer,+ han mga anak nga lalaki ni Helek, han mga anak nga lalaki ni Asriel, han mga anak nga lalaki ni Sikem, han mga anak nga lalaki ni Hefer, ngan han mga anak nga lalaki ni Semida. Ini an katulinan ni Manases nga anak nga lalaki ni Jose, an mga lalaki sumala ha ira mga pamilya.+
3 Kondi hi Zelopehad+ nga anak nga lalaki ni Hefer, nga anak nga lalaki ni Gilead, nga anak nga lalaki ni Makir, nga anak nga lalaki ni Manases, waray mga anak nga lalaki, mga anak nga babaye la, ngan ini an mga ngaran han iya mga anak nga babaye: hira Mala, Noa, Hogla, Milca, ngan Tirza.
4 Salit kinadto hira ha atubangan ni Eleazar+ nga saserdote, ni Josue nga anak ni Nun, ngan han mga lider, ngan nagsiring: “Hi Jehova an nagsugo kan Moises nga tagan kami hin panurundon ha butnga han amon mga bugto nga lalaki.”+ Salit uyon ha iginsugo ni Jehova, gintagan hira ni Josue hin panurundon ha butnga han mga bugto nga lalaki han ira tatay.+
5 May-ada liwat napulo nga malon nga iginhatag ha Manases labot han tuna han Gilead ngan Basan, nga nahimumutang didto ha tabok* han Jordan,+
6 kay an mga anak nga babaye ni Manases nakakarawat hin panurundon upod han iya mga anak nga lalaki, ngan an tuna han Gilead nagin panag-iya han iba pa nga katulinan ni Manases.
7 Ngan an tubtoban han Manases nagtitikang ha giutan han Aser tubtob ha Micmetat,+ nga naatubang ha Sikem,+ ngan an tubtoban nagpapadayon tipakadto ha sur* ngadto ha tuna han mga umurukoy han En-Tapua.
8 An tuna han Tapua+ nagin panag-iya han Manases, kondi an syudad han Tapua ha tubtoban han Manases gintatag-iya han katulinan ni Efraim.
9 Ngan an tubtoban nagtitipaubos ngadto ha Walog han Kana, ha sur han walog. May mga syudad an Efraim ha butnga han mga syudad han Manases,+ ngan an tubtoban han Manases nahimumutang ha norte han walog, ngan natatapos ito ha dagat.+
10 An tuna ha sur panag-iya han Efraim, ngan an tuna ha norte panag-iya han Manases, ngan an dagat an tubtoban han Manases,+ ngan ha norte naabot hira* ngadto ha teritoryo han Aser, ngan ha este, ha teritoryo han Isacar.
11 Ha mga teritoryo han Isacar ngan han Aser, iginhatag ha Manases an Bet-sean ngan an mga bungto nga sakop* hito, an Ibleam+ ngan an mga bungto nga sakop hito, an Dor+ (pati na an ngatanan nga umurukoy hito) ngan an mga bungto nga sakop hito, an En-dor+ (pati na an ngatanan nga umurukoy hito) ngan an mga bungto nga sakop hito, an Taanac+ (pati na an ngatanan nga umurukoy hito) ngan an mga bungto nga sakop hito, ngan an Megido (pati na an ngatanan nga umurukoy hito) ngan an mga bungto nga sakop hito, tulo han higtaas nga mga lugar.
12 Kondi waray makuha han katulinan ni Manases ini nga mga syudad; an mga Canaanita determinado nga magpadayon pag-ukoy hini nga tuna.+
13 Han nagin makusog an mga Israelita, gin-obligar nira nga magtrabaho an mga Canaanita,+ kondi diri ngatanan nga Canaanita ira ginpaiwas.+
14 An katulinan ni Jose nagsiring kan Josue: “Kay ano nga an iginhatag mo ha amon* sugad nga panurundon usa la nga malon pinaagi han pagripa+ ngan usa la nga bahín nga sinukol? Damu kami nga katawohan, kay ginbibendisyonan kami ni Jehova tubtob yana.”+
15 Hi Josue binaton ha ira: “Kon damu gud kamo nga katawohan, pakadto kamo ha kagurangan ngan paghawan didto hin lugar para ha iyo ha tuna han mga Perizita+ ngan han mga Refaim,+ kay sobra kagutiay para ha iyo an kabukiran han Efraim.”+
16 Katapos, an katulinan ni Jose nagsiring: “An kabukiran diri igo para ha amon, ngan an ngatanan nga Canaanita nga naukoy ha tuna han walog* may pan-girra nga mga karuwahe+ nga may mga espada nga nautwal ha mga kaliding,* an mga aadto ha Bet-sean+ ngan ha mga bungto nga sakop* hito ngan an mga aadto ha Walog* han Jezreel.”+
17 Salit ini an ginsiring ni Josue ha panimalay ni Jose, ha Efraim ngan ha Manases: “Damu kamo nga katawohan, ngan gamhanan kamo. Diri la usa nga malon an iyo makakarawat,+
18 kondi magigin iyo liwat an kabukiran.+ Bisan kon kagurangan ito, hahawanan niyo ito, ngan ito an magigin tubtoban han iyo teritoryo. Kay paiiwason niyo an mga Canaanita, bisan kon magkusog hira ngan may pan-girra nga mga karuwahe nga may mga espada nga nautwal ha mga kaliding.”*+
Mga footnote
^ Karuyag sidngon, an este.
^ Lit., “tipakadto ha too.”
^ Karuyag sidngon, an katawohan ni Manases o an teritoryo han Manases.
^ O “nakapalibot.”
^ Lit., “akon.”
^ O “Hamubo nga Kapatagan.”
^ O “nakapalibot.”
^ Lit., “mga karuwahe nga puthaw.”
^ O “han hamubo nga kapatagan.”
^ Lit., “mga karuwahe nga puthaw.”
