Josue 18:1-28
18 Katapos, an bug-os nga komunidad han mga Israelita nagkatirok ha Shilo,+ ngan ira ginbutang didto an tolda nga katirokan,+ kay nasakop na nira an tuna.+
2 Kondi may-ada pa pito nga tribo han mga Israelita nga waray pa mahatagi han ira panurundon.
3 Salit hi Josue nagsiring ha mga Israelita: “Tubtob san-o kamo maglalangan ha pagsulod ngan ha pagtag-iya han tuna nga iginhatag ha iyo ni Jehova nga Dios han iyo mga kaapoy-apoyan?+
4 Tagi ako hin tulo nga lalaki tikang ha tagsa nga tribo basi sugoon; sadang hira lumakat ngan libuton an tuna ngan himoan ito hin mapa sumala ha ira panurundon. Katapos, sadang hira bumalik ha akon.
5 Kinahanglan nira ito bahin-bahinon ha pito ka bahín.+ An Juda magpapabilin ha iya teritoryo ha sur,+ ngan an panimalay ni Jose magpapabilin ha ira teritoryo ha norte.+
6 May kalabotan ha iyo, himoi niyo hin mapa an tuna ngan bahin-bahina ito ha pito ka bahín, ngan dad-a ito ha akon. Ngan magriripa+ ako dinhi para ha iyo ha atubangan ni Jehova nga aton Dios.
7 Kondi an mga Levita diri tatagan hin malon ha butnga niyo,+ kay an pagin saserdote para kan Jehova an ira panurundon;+ ngan an Gad, an Ruben, ngan an katunga han tribo ni Manases+ nakakuha na han ira panurundon ha este han Jordan, nga iginhatag ha ira ni Moises nga surugoon ni Jehova.”
8 An mga lalaki nangandam ha paglakat, ngan ginsugo ni Josue adton maghihimo hin mapa han tuna: “Lakat kamo ngan libota an tuna ngan himoi ito hin mapa ngan balik kamo ha akon, ngan magriripa ako para ha iyo ha atubangan ni Jehova dinhi ha Shilo.”+
9 Salit an mga lalaki linakat ngan ginlibot an tuna ngan ginhimoan ito hin mapa; ginbahin-bahin nira ito ha pito sumala ha mga syudad hito ngan ginrekord ito ha usa nga libro. Katapos, binalik hira kan Josue ha kampo ha Shilo.
10 Katapos, hi Josue nagripa para ha ira ha Shilo ha atubangan ni Jehova.+ Didto ginbahin-bahin ni Josue ha mga Israelita an tuna sumala ha ira mga malon.+
11 Nakarawat han tribo ni Benjamin uyon ha ira mga pamilya an ira malon pinaagi han pagripa, ngan an teritoryo nga ira nakarawat pinaagi han pagripa nahimumutang ha butnga han katawohan ni Juda+ ngan han katawohan ni Jose.+
12 Ha norte, an ira tubtoban nagtitikang ha Jordan, ngan an tubtoban nagtitipaigbaw ngadto ha bakilid han Jerico+ ha norte ngan nagtitipaigbaw ngadto ha bukid tipa-weste, ngan naabot ito ha kamingawan han Bet-aven.+
13 Ngan tikang didto an tubtoban nagpapadayon ngadto ha Luz, ha sur nga bakilid han Luz, karuyag sidngon, an Bethel;+ an tubtoban nagtitipaubos ngadto ha Atarot-adar+ ha bukid ha sur han Ubos nga Bet-horon.+
14 Ngan an tubtoban nagpapadayon ha weste nga bahin ngan naliko ngadto ha sur tikang ha bukid nga naatubang ha Bet-horon ha sur; natatapos ito ha Kiriat-baal, karuyag sidngon, an Kiriat-jearim,+ usa nga syudad han Juda. Ini an weste nga bahin.
15 An sur nga bahin nagtitikang ha kataposan han Kiriat-jearim, ngan an tubtoban nagpapadayon tipa-weste; naabot ito ngadto ha burabod han katubigan han Neftoa.+
16 An tubtoban nagtitipaubos ngadto ha kataposan han bukid nga naatubang ha Walog han Anak nga Lalaki ni Hinom,+ an bukid nga nahimumutang ha norte nga kataposan han Walog* han Refaim,+ ngan nagtitipaubos ito ngadto ha Walog han Hinom, ngadto ha bakilid han syudad han mga Jebusita+ ha sur, ngan nagtitipaubos ngadto ha En-rogel.+
17 Ngan nagpapadayon ito tipa-norte ngan naabot ngadto ha En-semes ngan katapos ngadto ha Gelilot, nga nahimumutang ha atubangan han sagkahon han Adumim,+ ngan nagtitipaubos ito ngadto ha bato+ ni Bohan+ nga anak nga lalaki ni Ruben.
18 Ngan nagpapadayon ito ngadto ha norte nga bakilid ha atubangan han Araba ngan nagtitipaubos ngadto ha Araba.
19 Ngan an tubtoban nagpapadayon ngadto ha norte nga bakilid han Bet-hogla,+ ngan an tubtoban natatapos ha norte nga baybayon han Dagat nga Asin*+ ha sur nga kataposan han Jordan. Ini an tubtoban ha sur.
20 Ngan an Jordan amo an tubtoban ha este. Ini an panurundon han katulinan ni Benjamin uyon ha ira mga pamilya, sumala ha ngatanan nga tubtoban hito.
21 Ngan an mga syudad han tribo ni Benjamin uyon ha ira mga pamilya amo ini: Jerico, Bet-hogla, Emek-keziz,
22 Bet-araba,+ Zemaraim, Bethel,+
23 Avim, Para, Ofra,
24 Kefar-ammoni, Ofni, ngan Geba+—12 nga syudad ngan an mga baryo hito.
25 Gibeon,+ Rama, Beerot,
26 Mizpe, Kefira, Moza,
27 Rekem, Irpeel, Tarala,
28 Zelah,+ Ha-elef, Jebusi, karuyag sidngon, an Jerusalem,+ Gibeah,+ ngan Kiriat—14 nga syudad ngan an mga baryo hito.
Ini an panurundon han katulinan ni Benjamin uyon ha ira mga pamilya.
