Sumala kan Juan 14:1-31
14 “Ayaw pabay-i nga masubo an iyo kasingkasing.+ Magpakita kamo hin pagtoo ha Dios;+ magpakita liwat kamo hin pagtoo ha akon.
2 Ha balay han akon Amay damu an urukyan. Kon diri ini tinuod, diri na unta ako magsusumat ha iyo, kay makadto ako basi mag-andam hin lugar para ha iyo.+
3 Sugad man, kon kumadto ako ngan mag-andam hin lugar para ha iyo, mabalik ako ngan kakarawaton ko kamo ha akon balay, basi kon hain ako, aadto liwat kamo.+
4 Ngan maaram kamo han dalan tipakadto ha akon kakadtoan.”
5 Nagsiring hi Tomas+ ha iya: “Ginoo, diri kami maaram kon makain ka. Paonan-o namon mahibabaroan an dalan?”
6 Hi Jesus nagsiring ha iya: “Ako an dalan+ ngan an kamatuoran+ ngan an kinabuhi.+ Waray bisan hin-o nga nakakakadto ha Amay kon diri pinaagi ha akon.+
7 Kon kilala niyo ako, kilala liwat unta niyo an akon Amay; tikang yana kilala na niyo hiya ngan nakita na niyo hiya.”+
8 Nagsiring hi Felipe ha iya: “Ginoo, ipakita ha amon an Amay, ngan igo na ito para ha amon.”
9 Nagsiring hi Jesus ha iya: “Maiha na niyo ako nga kaupod, pero diri mo la ba gihapon ako kilala, Felipe? An bisan hin-o nga nakakita ha akon nakakita liwat ha Amay.+ Kay ano nga nasiring ka, ‘Ipakita ha amon an Amay’?
10 Diri ka ba natoo nga ako kahiusa han Amay ngan an Amay kahiusa ko?+ An mga butang nga akon ginsisiring ha iyo diri ko ginyayakan tikang ha akon kalugaringon nga mga ideya,+ pero an Amay nga nagpapabilin nga kahiusa ko nagbubuhat han iya mga buruhaton.
11 Too kamo ha akon nga ako kahiusa han Amay ngan an Amay kahiusa ko; kon diri man, too kamo tungod han mga buhat mismo.+
12 Ha pagkamatuod gud nasiring ako ha iyo, an bisan hin-o nga nagpapakita hin pagtoo ha akon magbubuhat liwat han mga buruhaton nga akon ginbubuhat; ngan magbubuhat hiya hin mga buruhaton nga mas labaw pa hini,+ kay makadto ako ha Amay.+
13 Sugad man, anoman an aroon niyo ha akon ngaran, ihahatag ko ito, basi mahimaya an Amay pinaagi han Anak.+
14 Kon mangaro kamo hin bisan ano ha akon ngaran, ihahatag ko ito.
15 “Kon nahigugma kamo ha akon, tutumanon niyo an akon mga sugo.+
16 Ngan maghahangyo ako ha Amay ngan tatagan niya kamo hin lain nga parabulig* basi makaupod niyo ha kadayonan,+
17 an espiritu han kamatuoran,+ nga diri nakakarawat han kalibotan, kay diri ito nakikita o hinbabaroan han kalibotan.+ Maaram kamo hito, kay nagpapabilin ito nga kaupod niyo ngan aada ha iyo.
18 Diri ko kamo babayaan nga nag-uusahan.* Makanhi ako ha iyo.+
19 Gutiay na la nga panahon, diri na ako makikita han kalibotan, pero makikita niyo ako,+ kay buhi ako ngan mabubuhi kamo.
20 Hito nga adlaw mahibabaroan niyo nga ako kahiusa han akon Amay ngan kamo kahiusa ko ngan ako kahiusa niyo.+
21 An bisan hin-o nga nakarawat han akon mga sugo ngan nagtutuman hito amo an nahigugma ha akon. Ngan an bisan hin-o nga nahigugma ha akon hihigugmaon liwat han akon Amay, ngan hihigugmaon ko hiya ngan ipapadayag ko hin matin-aw an akon kalugaringon ngada ha iya.”
22 Hi Judas,+ nga diri an Iscariote, nagpakiana ha iya: “Ginoo, ano an nahitabo nga karuyag mo man ipadayag hin matin-aw an imo kalugaringon ha amon ngan diri ha kalibotan?”
23 Binaton hi Jesus ha iya: “Kon an bisan hin-o nahigugma ha akon, tutumanon niya an akon pulong,+ ngan hihigugmaon hiya han akon Amay, ngan makadto kami ha iya ngan maukoy kaupod niya.+
24 An bisan hin-o nga diri nahigugma ha akon diri nagtutuman han akon mga pulong. An pulong nga iyo hinbabatian diri akon, kondi tikang ha Amay nga nagsugo ha akon.+
25 “Ginyayakan ko ha iyo ini nga mga butang samtang kaupod pa niyo ako.
26 Pero an parabulig, an baraan nga espiritu, nga susugoon han Amay ha akon ngaran, ito an magtututdo ha iyo han ngatanan nga butang ngan magpapahinumdom ha iyo han ngatanan nga butang nga akon iginsumat ha iyo.+
27 Iginbibilin ko ha iyo an kamurayawan; iginhahatag ko ha iyo an akon kamurayawan.+ Diri ko ito iginhahatag ha iyo ha paagi nga pariho han paghatag hito han kalibotan. Ayaw pabay-i nga an iyo kasingkasing masubo ngan manluya tungod han kahadlok.
28 Hinbatian niyo nga nagsiring ako ha iyo, ‘Mabaya ako ngan mabalik ako ha iyo.’ Kon hinigugma niyo ako, maglilipay kamo nga makadto ako ha Amay, kay an Amay mas labaw kay ha akon.+
29 Salit yana nagsumat ako ha iyo antes ito mahitabo, basi tumoo kamo kon mahitabo na ito.+
30 Diri na ako magyayakan hin damu pa ha iyo, kay tiabot an magmarando han kalibotan,+ ngan hiya waray gahum ha akon.*+
31 Pero basi mahibaro an kalibotan nga nahigugma ako ha Amay, ginbubuhat ko kon ano an iginsugo ha akon han Amay nga buhaton.+ Buhát kamo, pagkalakat na kita.
