An Kanta ni Solomon 1:1-17
-
Kanta han mga kanta (1)
-
Batan-on nga babaye (2-7)
-
Mga anak nga babaye han Jerusalem (8)
-
Hadi (9-11)
-
“Hihimoan ka namon hin bulawan nga mga alahas” (11)
-
-
Batan-on nga babaye (12-14)
-
“An akon pinalangga pariho hin mahamot nga surudlan hin mira” (13)
-
-
Paraataman hin panon (15)
-
“Mahusay ka, akon hinigugma”
-
-
Batan-on nga babaye (16, 17)
-
“Gwapo ka, akon pinalangga” (16)
-
1 An kanta han mga kanta,* nga kan Solomon:+
2 “Hinaot hadkan niya ako han mga harok han iya baba,Kay an imo mga kapahayagan han gugma mas maopay kay han bino.+
3 Makaruruyag an kahamot han imo mga lana.+
An imo ngaran pariho hin mahamot nga lana nga iginbububo.+
Ito an hinungdan nga an batan-on nga mga babaye nahigugma ha imo.
4 Ig-upod ako;* dalagan kita.
Gindara ako han hadi ha iya pribado nga mga kwarto!
Paglipay kita ngan pagrayhak nga magkaupod.
Dayawon* naton an imo mga kapahayagan han gugma, nga mas makaruruyag kay han bino.
Diri urusahon nga nahigugma hira* ha imo.
5 Maitom ako, kondi mahusay, O mga anak nga babaye han Jerusalem,Pariho han mga tolda han Kedar,+ pariho han pantolda nga mga tela+ ni Solomon.
6 Ayaw kamo pagkinita ha akon tungod kay maitom ako,Tungod kay nasunog ako han adlaw.
An mga anak nga lalaki han akon nanay nasina ha akon;Ira ako ginhimo nga parabantay ha mga urubasan,Pero an akon kalugaringon nga urubasan waray ko mabantayi.
7 Sumati ako, ikaw nga hinigugma ko gud,*Kon diin mo ginpapasabsab an imo panon,+Kon diin mo ito ginpapahigda ha kaudtuhon.
Kay ano nga magigin pariho ako hin babaye nga nagtahob hin belo*Ha butnga han mga panon han imo mga kaupod?”
8 “Kon diri ka maaram, O ikaw nga pinakamahusay ha mga babaye,Lakat ngan sundi an mga lutop* han mga tiil han panonNgan pasabsaba an imo nati nga mga kanding hirani ha mga tolda han mga paraataman hin panon.”
9 “Hinigugma ko, iginpapariho ko ikaw ha usa nga* kabayo nga babayé ha mga karuwahe han Paraon.+
10 Makaruruyag pagkit-on an imo mga bayhon nga may mga adorno,*An imo liog nga may mga kwintas.
11 Hihimoan ka namon hin bulawan nga mga alahas*
Nga ginbutangan hin mga silber.”
12 “Samtang nalingkod an hadi ha iya malidong nga lamesa,An akon pahamot*+ naghaharamot.
13 Para ha akon an akon pinalangga pariho hin mahamot nga surudlan hin mira+Nga aada ha akon dughan ha bug-os nga gab-i.
14 Para ha akon an akon pinalangga pariho hin urapong han henna+Dida ha mga urubasan han En-gedi.”+
15 “Kitaa! Mahusay ka, akon hinigugma.
Kitaa! Mahusay ka. An imo mga mata pariho han kanan mga sarapati.”+
16 “Kitaa! Gwapo ka, akon pinalangga, ngan makalilipay ka.+
Mga dahon an aton higdaan.
17 Mga kahoy nga sedro an mga sapayan han aton balay,*Mga kahoy nga abeto an mga pagbo han aton atop.
Mga footnote
^ O “An pinakamaopay nga kanta.”
^ Lit., “Dad-a ako kasunod mo.”
^ O “Pag-istoryahan.”
^ Karuyag sidngon, an batan-on nga mga babaye.
^ O “hin belo para ha pagtaguminatay.”
^ O “hinigugma gud han akon kalag.”
^ Ha iba nga lugar, “tiagi.”
^ O “ha akon.”
^ O posible nga “ha butnga han mga sinalapid nga buhok.”
^ O “malidong nga bulawan nga mga alahas.”
^ Lit., “nardo.”
^ O “maopay gud nga balay.”