Levitico 10:1-20
10 Ha urhi an mga anak nga lalaki ni Aaron nga hira Nadab ngan Abihu+ nagkuha han ira tagsa nga insensaryo ngan ginbutangan ito hin kalayo ngan ginbutangan ito hin insenso.+ Katapos, nagtikang hira paghalad hin diri awtorisado nga kalayo ha atubangan ni Jehova,+ nga waray niya igsugo nga buhaton nira.
2 Tungod hito, ginawas an kalayo tikang ha atubangan ni Jehova ngan gin-ugtang hira,+ salit namatay hira ha atubangan ni Jehova.+
3 Katapos, hi Moises nagsiring kan Aaron: “Ini an ginsiring ni Jehova, ‘Babaraanon ako han mga duok ha akon,+ ngan hihimayaon ako ha atubangan han ngatanan nga katawohan.’” Ngan hi Aaron nagpabilin nga hilom.
4 Salit gintawag ni Moises hira Misael ngan Elzapan, nga mga anak nga lalaki ni Uziel,+ nga batâ ni Aaron, ngan nagsiring ha ira: “Daop ngadi, dad-a an iyo mga bugto tikang ha atubangan han baraan nga lugar ngadto ha usa nga lugar ha gawas han kampo.”
5 Salit dinaop hira ngan gindara an mga lalaki nga nakasul-ot han ira higlaba nga mga bado ngadto ha usa nga lugar ha gawas han kampo, sugad han ginsiring ha ira ni Moises.
6 Katapos, hi Moises nagsiring kan Aaron ngan ha iya iba nga mga anak nga lalaki nga hira Eleazar ngan Itamar: “Ayaw pasagdi nga maggurunggong an iyo buhok o ayaw paggisia an iyo mga bado,+ basi diri kamo mamatay ngan basi an Dios diri masina ha bug-os nga komunidad. An iyo kabugtoan ha bug-os nga panimalay ni Israel magtatangis tungod han mga ginpatay ni Jehova pinaagi han kalayo.
7 Ayaw kamo paggawas tikang ha aragian tipasulod ha tolda nga katirokan kay mamamatay kamo, tungod kay an pandihog nga lana ni Jehova aada ha iyo.”+ Salit ira ito ginbuhat sumala han pulong ni Moises.
8 Katapos, hi Jehova nagsiring kan Aaron:
9 “Ayaw pag-inom hin bino o iba nga de-alkohol nga mga irimnon, ikaw ngan an imo mga anak nga upod nimo, kon masulod kamo ha tolda nga katirokan,+ basi diri kamo mamatay. Usa ito nga permanente nga surundon para ha iyo mga henerasyon.
10 Basi mahibaroan an kaibahan han baraan nga butang ngan han diri baraan, ngan an kaibahan han mahugaw nga butang ngan han malimpyo,+
11 ngan basi tutdoan an mga Israelita han ngatanan nga regulasyon nga ginyakan ha ira ni Jehova pinaagi kan Moises.”+
12 Katapos, hi Moises nagsiring kan Aaron ngan kanda Eleazar ngan Itamar, an nahibilin nga iya mga anak: “Kuhaa an nahisalin han halad nga tikang ha lugas tikang ha mga halad nga ginsunog ha kalayo para kan Jehova ngan kaona ito hirani ha halaran sugad nga tinapay nga waray libadura,+ kay baraan gud ito nga butang.+
13 Kinahanglan kaunon niyo ito ha baraan nga lugar,+ kay iyo ito malon ngan malon han iyo mga anak tikang ha mga halad nga ginsunog ha kalayo para kan Jehova, kay ini an iginsugo ha akon.
14 Kakaunon liwat niyo an dughan han halad nga gin-aabyog ngan an paa han sagrado nga bahin+ ha malimpyo nga lugar, ikaw ngan an imo mga anak nga lalaki ngan an imo mga anak nga babaye nga upod nimo,+ kay ini nga mga butang iginhatag sugad nga imo malon ngan malon han imo mga anak tikang ha mga halad nga ginsasarosaroan han mga Israelita.
15 Dadad-on nira an paa han sagrado nga bahin ngan an dughan han halad nga gin-aabyog upod han mga halad nga tambok nga ginsunog ha kalayo, basi ig-abyog an halad nga gin-aabyog ngadto-nganhi ha atubangan ni Jehova; ngan ito an magigin permanente nga malon para ha imo ngan ha imo mga anak nga upod nimo,+ sugad han iginsugo ni Jehova.”
16 Ngan ginbiniling hin maopay ni Moises an kanding nga halad tungod han sala,+ ngan nahibaroan niya nga ginsunog na ito. Salit nasina hiya kanda Eleazar ngan Itamar, an nahibilin nga mga anak ni Aaron, ngan hiya nagsiring:
17 “Kay ano nga waray niyo kaona an halad tungod han sala ha baraan nga lugar,+ kay baraan gud ito nga butang ngan iya ito iginhatag ha iyo basi kamo an may baratunon han sayop han komunidad ngan maghimo han pagpara han sala para ha ira ha atubangan ni Jehova?
18 Kitaa! An dugo hito waray dad-a ha sulod han baraan nga lugar.+ Iyo gud unta ito ginkaon ha baraan nga lugar, sugad han iginsugo ha akon.”
19 Hi Aaron binaton kan Moises: “Kitaa! Yana nga adlaw ira iginhalad an ira halad tungod han sala ngan an ira halad nga sinunog ha atubangan ni Jehova,+ pero ini nga mga butang nahitabo ha akon. Kon akon ginkaon an halad tungod han sala yana nga adlaw, makakapalipay ba ito kan Jehova?”
20 Han nabatian ito ni Moises, inuyon hiya.
