Sumala kan Mateo 3:1-17
3 Paglabay han panahon, hi Juan+ Bawtista inabot ngan nagsangyaw+ ha kamingawan han Judea,
2 nga nasiring: “Pagbasol kamo, kay an Ginhadian han langit hirani na.”+
3 Ha pagkamatuod, hiya an gin-unabi hini nga mga pulong pinaagi kan Isaias nga propeta:+ “May tingog nga naguliat ha kamingawan: ‘Ig-andam niyo an dalan ni Jehova!* Tadonga an iya mga kalsada.’”+
4 Hi Juan nakasul-ot hin bado nga tikang ha barahibo han kamelyo ngan hin paha nga anit ha iya hawak.*+ An iya pagkaon mga duron ngan dugos han ihalas nga mga putyukan.+
5 Katapos, an mga tawo ha Jerusalem, ha bug-os nga Judea, ngan ha ngatanan nga lugar ha palibot han Jordan kinadto ha iya,+
6 ngan ginbawtismohan* niya hira ha Salog Jordan,+ ngan dayag nga iginsumat nira an ira mga sala.
7 Han nakita niya an damu nga Pariseo ngan Saduseo+ nga nagkakaabot ha lugar han bawtismo, nagsiring hiya ha ira: “Kamo nga katulinan han maglara nga mga halas,+ hin-o an nagpahamangno ha iyo nga pumalagiw tikang ha tiarabot nga kapungot?+
8 Salit pagpakita hin bunga nga nagpapamatuod nga nagbabasol kamo.
9 Ayaw kamo paghunahuna ha pagsiring ha iyo kalugaringon, ‘Hi Abraham an amon amay.’+ Kay nasiring ako ha iyo nga an Dios makakahimo hin mga anak para kan Abraham tikang hini nga mga bato.
10 An atsa nakapwesto na ha gamot han mga kahoy. Salit an tagsa nga kahoy nga diri nagbubunga hin maopay pupudlon ngan ilalabog ha kalayo.+
11 Ako nagbabawtismo ha iyo pinaagi han tubig tungod han iyo pagbasol,+ kondi hiya nga maabot kasunod ko mas may awtoridad kay ha akon, ngan diri ako takos maghukas han iya sandalyas.+ Babawtismohan niya kamo pinaagi han baraan nga espiritu+ ngan pinaagi han kalayo.+
12 Ginkakaptan niya an iya pala para ha pagpalíd, ngan lilimpyohan niya hin bug-os an iya giriokan ngan titirukon an iya trigo ngadto ha bodega, kondi an upa iya susunugon ha kalayo+ nga diri mapaparong.”
13 Katapos, tikang ha Galilea kinadto hi Jesus kan Juan didto ha Jordan basi magpabawtismo ha iya.+
14 Kondi hi Juan nangalimbasog pagpugong ha iya, nga nasiring: “Ako an kinahanglan mo bawtismohan, pero ikaw an napakanhi ha akon?”
15 Hi Jesus binaton ha iya: “Pabay-i la ini yana, kay hini nga paagi angay naton buhaton an ngatanan nga matadong.” Salit waray na hiya pugngi ni Juan.
16 Katapos mabawtismohan hi Jesus, hinaw-as dayon hiya ha tubig; ngan kitaa! naabrihan an langit,+ ngan nakita niya* an espiritu han Dios nga nalusad sugad hin sarapati ngan napakada ha bawbaw niya.*+
17 Kitaa! May tingog liwat tikang ha langit+ nga nagsiring: “Ini an akon Anak+ nga hinigugma, nga gin-uuyonan ko.”+
Mga footnote
^ Ha iba nga lugar, “kupsan.”
^ O “igintunlob; iginpailarom.”
^ Posible nga nagtutudlok kan Juan.
^ Karuyag sidngon, hi Jesus.
