Nahum 1:1-15
1 Usa nga mensahe kontra ha Nineve:+ An libro han bisyon ni Nahum* nga Elkosita:
2 Hi Jehova usa nga Dios nga nagsusugo nga ihatag ha iya an eksklusibo nga debosyon,+ ngan nabulos hiya;Hi Jehova nabulos ngan andam ha pagpakita han iya kapungot.+
Hi Jehova nabulos ha mga nakontra ha iya,Ngan iya gintitirok an kapungot para ha iya mga kaaway.
3 Hi Jehova diri madagmit masina+ ngan daku an gahum,+Pero diri gud hi Jehova magpupugong han angay nga sirot.+
An iya aragian aada ha nakakabungkag nga hangin ngan bagyo,Ngan an mga dampog amo an tapotapo ha iya mga tiil.+
4 Iya ginsasaway an dagat,+ ngan iya ito ginpapahubas;Ngan iya ginpapamara an ngatanan nga salog.+
An Basan ngan an Carmel nauuga,+Ngan an mga bukad ha Lebanon nauuga.
5 An kabukiran nababay-og tungod ha iya,Ngan an mga bungtod natutunaw.+
An tuna maalsa tungod han iya nawong,Pati an kalibotan ngan an ngatanan nga naukoy dida hito.+
6 Hin-o an makakaatubang ha iya kangalas?+
Ngan hin-o an makakailob ha kapaso han iya kasina?+An iya kapungot maglalaga pariho hin kalayo,Ngan an mga bato magkakapupusak tungod ha iya.
7 Hi Jehova maopay,+ usa nga balwarte ha adlaw han kasakitan.+
Mahunahunaon* hiya ha mga naayop ha iya.+
8 Pinaagi hin masulog nga baha bug-os nga bubungkagon niya ito* nga lugar,Ngan lalanaton han kasisidman an iya mga kaaway.
9 Ano an iyo magigin plano kontra kan Jehova?
Nagpapahinabo hiya hin bug-os nga pagpoo.
An kasakitan diri mahitatabo ha ikaduha nga higayon.+
10 Kay nagbuburobalighot hira pariho hin katunokan,Ngan pariho hira ha mga nahubog hin serbesa;*
Pero mauugtang hira pariho han uga nga dagami.
11 Tikang ha imo maabot an usa nga nagpaplano hin maraot kontra kan Jehova,Naghahatag hin waray pulos nga sagdon.
12 Ini an siring ni Jehova:
“Bisan kon magkusog hira ngan damu,Pag-uutdon la gihapon hira ngan mamamatay.*
Ginpaantos ko ikaw,* pero diri ko na ikaw paaantuson.
13 Ngan yana akon babarion an iya yugo tikang ha imo,+Ngan akon uutdon an imo mga gapos.
14 Hi Jehova nagsugo may kalabotan ha imo,*‘An imo ngaran diri na magpapadayon.
Akon kukuhaon an inukit nga mga imahen ngan an metal nga mga rebulto* tikang ha balay* han imo mga dios.
Maghihimo ako hin lubnganan para ha imo, kay waray ka pulos.’
15 Kitaa! Aada ha kabukiran an mga tiil han usa nga nagdadara han maopay nga sumat,Han usa nga nagpapasamwak han kamurayawan.+
Iselebrar an imo mga piyesta,+ O Juda, tumana an imo mga saad,Kay an usa nga waray pulos diri na gud maagi utro ha imo.
Mabubungkag gud hiya.”
Mga footnote
^ Nangangahulogan nga “Paraliaw.”
^ O “Nagmamangno.” Lit., “Nakilala.”
^ Karuyag sidngon, an Nineve.
^ O “serbesa nga tikang ha trigo.”
^ O posible nga “ngan hiya malabay.”
^ Karuyag sidngon, an Juda.
^ Karuyag sidngon, an Asirya.
^ O “an hinurma nga mga rebulto.”
^ O “templo.”
