Nehemias 1:1-11
1 An mga pulong ni Nehemias*+ nga anak nga lalaki ni Hacalias: Ha bulan han Kislev,* ha ika-20 ka tuig, nakadto ako ha balwarte* han Susan.*+
2 Hito nga panahon hi Hanani,+ nga usa han akon kabugtoan, inabot upod an iba nga kalalakin-an tikang ha Juda, ngan ginpakianhan ko hira mahitungod ha nanhibilin nga mga Judio nga nakatalwas ha pagkabihag,+ ngan mahitungod liwat ha Jerusalem.
3 Binaton hira: “An mga nanhibilin ha probinsya* nga nakatalwas ha pagkabihag aada ha maraot gud nga kahimtang ngan ha kaalohan.+ Ruba an mga pader han Jerusalem,+ ngan an mga ganghaan hito ginsunog ha kalayo.”+
4 Pakabati ko gud hini nga mga pulong, liningkod ako ngan nagtinangis ngan nabido hin pipira ka adlaw, ngan padayon ako nga nagpuasa+ ngan nag-ampo ha atubangan han Dios han langit.
5 Nagsiring ako: “O Jehova, an Dios han langit, an Dios nga harangdon ngan urusahon gud* nga nagtutuman han kasabotan nga iya ginhimo ngan nagpapakita hin maunungon nga gugma ha mga nahigugma ha iya ngan nasugot ha iya mga sugo,+
6 alayon, mamati unta an imo talinga ngan magin abrido unta an imo mga mata ha pagpamati ha pag-ampo han imo surugoon nga igin-aampo ko ha imo yana. Ha adlaw ngan ha gab-i+ nag-aampo ako mahitungod ha mga Israelita nga imo mga surugoon, ngan hinin bug-os nga panahon iginsusumat ko an mga sala nga ginbuhat han katawohan han Israel kontra ha imo. Nakasala kami, ako ngan an panimalay han akon amay.+
7 Nagbuhat gud kami hin maraot kontra ha imo+ kay waray namon tumana an mga sugo, mga regulasyon, ngan hudisyal nga mga desisyon nga imo iginhatag ha imo surugoon nga hi Moises.+
8 “Alayon hinumdumi an imo ginsiring* ha imo surugoon nga hi Moises: ‘Kon diri kamo magin matinumanon, igsasarang ko kamo ha butnga han mga katawohan.+
9 Pero kon bumalik kamo ha akon ngan tumanon an akon mga sugo ngan sugton ito, bisan kon an iyo nagpatlaag nga katawohan aadto ha kataposan han langit, titirukon ko hira+ tikang didto ngan dadad-on hira ha lugar nga ginpili ko basi ukyan han akon ngaran.’+
10 Imo hira mga surugoon ngan imo katawohan, nga imo gintubos pinaagi han imo daku nga gahum ngan han imo gamhanan nga kamot.+
11 O Jehova, alayon, mamati unta an imo talinga ha pag-ampo han imo surugoon ngan ha pag-ampo han imo mga surugoon nga nalilipay ha pagkahadlok ha imo ngaran, ngan alayon, tagi hin kalamposan an imo surugoon yana nga adlaw, ngan hinaot magpakita hin pagpaid ha akon ini nga tawo.”+
Hito nga panahon ako an paraserbi han irimnon han hadi.+
Mga footnote
^ Nangangahulogan nga “Hi Jah Nagliliaw.”
^ O “palasyo; kuta.”
^ O “Susa.”
^ O “sakop nga distrito.”
^ O “ngan nakakaaghat hin hilarom nga respeto nga may kahadlok.”
^ O “iginpahamangno.”
