Nehemias 5:1-19
5 Kondi an katawohan ngan an ira mga asawa may daku nga reklamo kontra ha ira Judio nga kabugtoan.+
2 An iba nasiring: “Damu kami ngan an amon mga anak nga lalaki ngan an amon mga anak nga babaye. Kinahanglan makakuha kami hin lugas* basi makakaon ngan padayon nga mabuhi.”
3 An iba nasiring: “Amon iginhahatag sugad nga garantiya an amon mga uma ngan an amon mga urubasan ngan an amon mga balay basi makakuha hin lugas ha panahon han kakulang hin pagkaon.”
4 An iba naman nasiring: “Nangutang kami hin kwarta gamit an amon mga uma ngan mga urubasan basi makahatag hin bayad* ha hadi.+
5 Yana an amon unod ngan dugo kapariho han ha amon kabugtoan,* ngan an amon mga anak pariho han ira mga anak; pero kinahanglan namon ipauripon an amon mga anak nga lalaki ngan mga anak nga babaye, ngan an iba han amon mga anak nga babaye mga uripon na.+ Kondi waray kami gahum ha pagpaundang hini, kay an amon mga uma ngan an amon mga urubasan gintatag-iya han iba.”
6 Nasina gud ako han nabatian ko an ira reklamo ngan ini nga mga pulong.
7 Salit ginpamurubuot ko ini nga mga butang ha akon kasingkasing, ngan ginsukmat ko an mga dungganon ngan an kabulig nga mga magmarando ngan ginsidngan hira: “An tagsa ha iyo nangangaro hin interes* tikang ha iyo bugto.”+
Dugang pa, nag-organisar ako hin daku nga katirok tungod ha ira.
8 Ngan nagsiring ako ha ira: “Tubtob ha mahihimo, ginpalit namon utro an amon kalugaringon nga Judio nga kabugtoan nga iginbaligya ha mga nasud; pero ibabaligya ba niyo yana an iyo kalugaringon nga kabugtoan,+ ngan ibabaligya ba hira utro ha amon?” Tungod hito waray hira makatingog, ngan waray hira makahunahuna hin ibabaton.
9 Katapos nagsiring ako: “Diri maopay an iyo ginbubuhat. Diri ba sadang kamo maglakat nga may kahadlok ha aton Dios+ basi an mga nasud, nga aton mga kaaway, diri makatamay ha aton?
10 Dugang pa, ako, an akon kabugtoan, ngan an akon mga kabulig nagpapautang ha ira hin kwarta ngan hin lugas. Alayon, iundang na naton ini nga pagpautang nga may interes.+
11 Alayon ibalik ha ira hini mismo nga adlaw an ira mga uma,+ an ira mga urubasan, an ira kakahoyan nga olibo, ngan an ira mga balay, pati na an ika-100 ka bahin* han kwarta, han lugas, han bag-o nga bino, ngan han lana nga iyo gin-aaro sugad nga interes tikang ha ira.”
12 Binaton hira: “Ibabalik namon ha ira ini nga mga butang ngan waray kami aaroon sugad nga kabalyo. Bubuhaton namon kon ano gud an imo ginsiring.” Salit gintawag ko an mga saserdote ngan ginpasumpa ito nga kalalakin-an nga tumanon ini nga saad.
13 Sugad man, akon iginpagpag an mga pilo han akon bado* ngan nagsiring: “Hini nga paagi ipagpag unta han tinuod nga Dios tikang ha iya balay ngan tikang ha iya mga panag-iya an tagsa nga tawo nga diri magtutuman hini nga saad, ngan hini nga paagi ipagpag unta hiya ngan mawad-an han ngatanan.” An bug-os nga kongregasyon binaton: “Amen!”* Ngan ira gindayaw hi Jehova, ngan gintuman han katawohan an ira iginsaad.
14 Dugang pa, tikang han adlaw nga igintoka ako han hadi nga magin gobernador+ nira ha tuna han Juda, tikang han ika-20 ka tuig+ tubtob han ika-32 ka tuig+ ni Hadi Artaxerxes+—12 ka tuig—ako o bisan an akon kabugtoan waray kumaon han sustento nga pagkaon para ha gobernador.+
15 Kondi an mga gobernador nga nahiuna ha akon nagpabug-at ha katawohan ngan nagkuha tikang ha ira hin 40 ka sekel* nga silber kada adlaw para hin tinapay ngan bino. Sugad man, gintalumpigos han ira mga kabulig an katawohan. Pero waray ko ito buhata+ tungod han kahadlok ha Dios.+
16 Dugang pa, binulig ako ha pagtrabaho hini nga pader, ngan waray kami pumalit hin bisan usa nga uma;+ an ngatanan ko nga kabulig nagtirirok didto para ha buruhaton.
17 May 150 nga Judio ngan kabulig nga mga magmarando nga nangangaon ha akon lamesa, sugad man an mga kinanhi ha amon tikang ha mga nasud.
18 Kada adlaw usa nga todo nga baka, unom nga mag-opay gud nga karnero, ngan mga tamsi an igin-aandam para ha akon,* ngan makausa kada napulo ka adlaw hura kami han ngatanan nga klase hin bino. Bisan pa hini ngatanan, waray ko aroa an sustento nga pagkaon para ha gobernador, kay mabug-at na an ginpapas-an han katawohan ha pagserbi ha hadi.
19 O Dios ko, hinumdumi ako nga may pag-uyon tungod han ngatanan nga ginbuhat ko para hini nga katawohan.+
Mga footnote
^ Lit., “an amon unod pariho han unod han amon kabugtoan.”
^ O “daku nga tubo.”
^ O “1 ka porsyento,” karuyag sidngon, binulan.
^ Lit., “iginpagpag an akon dughan.”
^ O “Matuman unta!”
^ O “nga ako an nagasto.”
