Numeros 9:1-23
9 Hi Jehova nakiistorya kan Moises ha kamingawan han Sinai, ha siyahan nga bulan+ han ikaduha ka tuig katapos han ira paggawas ha tuna han Ehipto, nga nasiring:
2 “Kinahanglan ig-andam han mga Israelita an halad para ha Paskua+ ha itinanda nga panahon para hito.+
3 Ha ika-14 ka adlaw hini nga bulan ha pagtikasirom,* kinahanglan iyo ito ig-andam ha itinanda nga panahon para hito. Uyon ha ngatanan nga surundon para hito ngan ngatanan nga proseso para hito, kinahanglan iyo ito ig-andam.”+
4 Salit ginsidngan ni Moises an mga Israelita nga ig-andam an halad para ha Paskua.
5 Katapos, ira igin-andam an halad para ha Paskua ha siyahan nga bulan, ha ika-14 ka adlaw han bulan ha pagtikasirom,* didto ha kamingawan han Sinai. Uyon ha ngatanan nga iginsugo ni Jehova kan Moises, ito gud an ginbuhat han mga Israelita.
6 Yana may mga tawo nga nagin mahugaw pinaagi han pagkapot hin patay nga lawas,*+ amo nga waray hira makag-andam han halad para ha Paskua hito nga adlaw. Salit ito nga mga tawo kinadto ha atubangan nira Moises ngan Aaron hito nga adlaw+
7 ngan nagsiring ha iya: “Mahugaw kami tungod han pagkapot hin patay nga lawas.* Diri gud ba kami puydi maghalad han halad para kan Jehova ha itinanda nga panahon para hito kaupod han mga Israelita?”+
8 Hi Moises binaton ha ira: “Paghulat kamo dida, ngan pamamatian ko kon ano an igsusugo ni Jehova may kalabotan ha iyo.”+
9 Katapos, hi Jehova nagsiring kan Moises:
10 “Sumati an mga Israelita, ‘Bisan kon may tawo dida ha iyo o ha iyo tiarabot nga mga henerasyon nga magigin mahugaw pinaagi ha pagkapot hin patay nga lawas*+ o magbibiyahe hin hirayo, kinahanglan pa gihapon hiya mag-andam han halad ha Paskua para kan Jehova.
11 Kinahanglan ig-andam nira ito ha ikaduha ka bulan,+ ha ika-14 ka adlaw ha pagtikasirom.* Kakaunon nira ito kaupod han tinapay nga waray libadura ngan mga utanon nga mapait.+
12 Kinahanglan waray hira igsalin nga bisan ano hito tubtob ha kaaga,+ ngan diri nira babarion an bisan ano nga tul-an hito.+ Sadang nira ito ig-andam uyon ha tagsa nga surundon may kalabotan han Paskua.
13 Pero kon an usa nga tawo malimpyo o waray magbiyahe ngan nagpasibaya ha pag-andam han halad para ha Paskua, ito nga tawo* kinahanglan patayon,*+ kay waray niya ighalad an halad para kan Jehova ha itinanda nga panahon para hito. Ito nga tawo magkakaada baratunon tungod han iya sala.
14 “‘Ngan kon may dayo nga residente nga naukoy kaupod niyo, kinahanglan mag-andam liwat hiya han halad ha Paskua para kan Jehova.+ Bubuhaton niya ito sumala han surundon para ha Paskua ngan han proseso para hito.+ Usa la an magigin surundon para ha iyo, para ha dayo nga residente ngan ha Israelita.’”+
15 Ha adlaw nga natindog na an tabernakulo,+ gintabonan han dampog an tabernakulo, an tolda han Pagpamatuod, pero ha pagsirom an sugad hin kalayo nagpabilin ha bawbaw han tabernakulo tubtob ha kaaga.+
16 Ito an padayon nga nahitatabo: An dampog nagtatabon hito ha aga, ngan an sugad hin kalayo ha gab-i.+
17 Ha kada panahon nga nagtitipaigbaw an dampog tikang ha tolda, nalarga dayon an mga Israelita,+ ngan ha lugar diin naundang* an dampog, didto nagkakampo an mga Israelita.+
18 Ha sugo ni Jehova nalarga an mga Israelita, ngan ha sugo ni Jehova nagkakampo hira.+ Samtang an dampog nagpapabilin ha bawbaw han tabernakulo, nagpapabilin hira ha ira kampo.
19 Kon an dampog nagpapabilin ha bawbaw han tabernakulo hin damu ka adlaw, an mga Israelita nasugot kan Jehova ngan diri nalarga.+
20 Usahay an dampog nagpapabilin ha bawbaw han tabernakulo hin pipira ka adlaw. Ha sugo ni Jehova nagpapabilin hira ha ira kampo, ngan ha sugo ni Jehova nalarga hira.
21 Usahay an dampog nagpapabilin la tikang ha pagsirom tubtob ha kaaga, ngan kon ha aga nagtitipaigbaw an dampog, nalarga hira. Adlaw man ito o gab-i kon nagtitipaigbaw an dampog, nalarga hira.+
22 Duha man ito ka adlaw, usa ka bulan, o mas maiha pa, tubtob nga an dampog nagpapabilin ha bawbaw han tabernakulo, an mga Israelita nagpapabilin ha ira kampo ngan diri nalarga. Pero kon nagtitipaigbaw ito, nalarga hira.
23 Ha sugo ni Jehova nagkakampo hira, ngan ha sugo ni Jehova nalarga hira. Ira gintuman an ira obligasyon kan Jehova uyon ha sugo ni Jehova pinaagi kan Moises.
Mga footnote
^ Matin-aw nga nagtutudlok ha panahon butnga han pagtunod han adlaw ngan han pagsirom.
^ Matin-aw nga nagtutudlok ha panahon butnga han pagtunod han adlaw ngan han pagsirom.
^ O “pinaagi hin kalag nga tawo.”
^ O “tungod hin kalag nga tawo.”
^ O “pinaagi hin kalag.”
^ Matin-aw nga nagtutudlok ha panahon butnga han pagtunod han adlaw ngan han pagsirom.
^ O “kalag.”
^ Lit., “utdon tikang ha iya katawohan.”
^ Ha iba nga lugar, “natuko.”
