Obadias 1:1-21
1 An bisyon ni Obadias:*
Ini an siring ni Jehova nga Soberano nga Ginoo mahitungod han Edom:+“Nakabati kami hin sumat tikang kan Jehova,May representante nga ginsugo ha mga nasud:
‘Buhát, pag-andam kita ha pakiggirra ha iya.’”+
2 “Kitaa! Ginhimo ko ikaw nga minos ha butnga han mga nasud;Gintamay ka hinduro.+
3 An pagkamapahitas-on han imo kasingkasing naglimbong ha imo,+Ikaw nga naukoy ha mga buho han hitaas nga bato,Naukoy ha hitaas, ngan nasiring ha imo kasingkasing,‘Hin-o an maglulusad ha akon ngada ha tuna?’
4 Bisan kon himoon mo an imo urukyan ha hitaas* pariho han agila,O ibutang mo an imo salag ha mga bitoon,Iglulusad ko ikaw tikang didto,” nasiring hi Jehova.
5 “Kon an mga kawatan kumada ha imo, an mga tulisan ha gab-i,(Madadaot ka gud!)*
Diri ba an ira la karuyag an ira kakawaton?
O kon mga mag-arani han ubas an kumada ha imo,Diri ba hira magsasalin hin mga ubas nga kukuhaon han iba?+
6 Pero ira nabilngan an ngatanan nga gintatag-iya ni Esau ngan ginpanguha ito!
Waray gud nahibilin ha iya tinago nga mga bahandi!
7 Gintabog ka nira tubtob ha giutan.
Ginlimbongan ka han ngatanan mo nga kaalyansa.*
Ginpirde ka han mga tawo nga murayaw nga nakikig-upod ha imo.
An mga nakaon hin tinapay kaupod mo magbibitad hin pukot ha imo ilarom,Pero diri mo ito mahibabaroan.
8 Hito nga adlaw,” nasiring hi Jehova,“Diri ko ba papatayon an mga maaramon ha Edom+Ngan an mga may husto nga pagturotimbang dida ha kabukiran ni Esau?
9 Ngan an imo mga girriro mahahadlok gud,+ O Teman,+Kay an kada tagsa ha kabukiran ni Esau pamamatayon.+
10 Tungod han kamadarahog nga ginbuhat ha imo bugto nga hi Jacob,+Mapuputos ka han kaarawdan,+Ngan mapupoo ka ha kadayonan.+
11 Han adlaw nga tinindog ka ha ligid,Han adlaw nga ginbihag han mga estranghero an iya kasundalohan,+Han an mga dayo sinulod ha iya ganghaan ngan ginripahan+ an Jerusalem,Ginios ka nga sugad hin usa ha ira.
12 Diri ka angay malipay tungod ha nahitabo ha imo bugto ha adlaw han iya kakurian,+Diri ka angay magrayhak tungod ha katawohan han Juda ha adlaw han ira kabungkagan,+Ngan diri ka angay maghinambog ha imo pagyakan ha adlaw han ira kasakitan.
13 Diri ka angay sumulod ha ganghaan han akon katawohan ha adlaw han ira kadaot,+Diri ka angay malipay tungod ha kakurian nga nahitabo ha iya ha adlaw han iya kadaot,Ngan diri mo angay labtan an iya bahandi ha adlaw han iya kadaot.+
14 Diri ka angay tumindog ha gintatapoan han mga dalan basi pamatayon an mga napalagiw,+Ngan diri mo angay itubyan ha mga kaaway an iya mga tawo nga nakatalwas ha adlaw han kasakitan.+
15 Kay an adlaw ni Jehova kontra ha ngatanan nga nasud hirani na.+
An imo ginbuhat, amo man an pagbubuhaton ha imo.+
Kon paonan-o mo gintratar an iba, sugad liwat hito an magigin pagtratar ha imo.
16 Kay sugad han iyo pag-inom didto ha akon baraan nga bukid,An ngatanan nga nasud magpapadayon ha pag-inom.+
Uubuson nira ito pag-inom,Ngan hira magigin sugad hin waray gud hira umeksister.
17 Pero makadto ha Bukid Zion an mga napalagiw,+Ngan magigin baraan ito;+Ngan pagtatag-iyahon han panimalay ni Jacob an ira mga panag-iya.+
18 An panimalay ni Jacob magigin kalayo,An panimalay ni Jose magigin laga,Ngan an panimalay ni Esau pariho hin dagami;Ira ito susunugon ngan uugtangon ito,Ngan waray makakatalwas ha panimalay ni Esau,+Kay hi Jehova mismo an nagyakan.
19 Ira pagtatag-iyahon an Negeb ngan an kabukiran ni Esau,+An Sefela ngan an tuna han mga Filisteo.+
Ira pagtatag-iyahon an tuna han Efraim ngan an tuna han Samaria,+Ngan pagtatag-iyahon ni Benjamin an Gilead.
20 An mga distyero tikang hini nga bungdo,*+An katawohan han Israel amo an magtatag-iya han tuna han mga Canaanita tubtob ha Zarepat.+
Ngan an mga distyero tikang ha Jerusalem, nga nakadto ha Sefarad, amo an magtatag-iya han mga syudad han Negeb.+
21 Ngan an mga paratalwas masagka ha Bukid Zion
Basi hukman an kabukiran ni Esau,+Ngan an pagkahadi magigin kan Jehova.”+
Mga footnote
^ Nangangahulogan nga “Surugoon ni Jehova.”
^ O posible nga “lumupad ka hin hitaas.”
^ O posible nga “Mationan-o kadaku an ira madadaot?”
^ O “ngatanan nga may kasabotan ha imo.”
^ O “kuta.”
