An Pahayag kan Juan 15:1-8
15 Ngan nakita ko ha langit an usa pa nga tigaman, nga daku ngan urusahon, pito nga anghel+ nga may pito nga peste. Ini an kataposan nga mga peste, kay pinaagi hini matatapos an kasina han Dios.+
2 Ngan may nakita ako nga pariho hin dagat nga salaming+ nga may salakot nga kalayo, ngan an mga nagdadaog+ kontra ha mapintas nga hayop ngan ha imahen hito+ ngan ha numero han ngaran hito+ natindog hirani ha dagat nga salaming, nga may ginkakaptan nga mga arpa han Dios.
3 Nagkakanta hira han kanta ni Moises+ nga uripon han Dios ngan han kanta han Kordero,+ nga nasiring:
“Dagku ngan urusahon an imo mga buhat,+ Jehova* nga Dios, an Makagarahum-ha-ngatanan.+ Matadong ngan tinuod an imo mga paagi,+ Hadi ha kadayonan.+
4 Hin-o an diri gud mahahadlok ha imo, Jehova,* ngan maghihimaya han imo ngaran, kay ikaw gud la an maunungon?+ Kay an ngatanan nga nasud makanhi ngan magsisingba ha imo atubangan,+ tungod kay an imo magtadong nga mga sugo iginpahayag na.”
5 Katapos hini nakita ko, ngan an santuaryo han tolda han pamatuod+ gin-abrihan ha langit,+
6 ngan an pito nga anghel nga may pito nga peste+ ginawas ha santuaryo, nga nakabado hin malimpyo, mainggat nga lino ngan may bulawan nga mga paha nga nakapalibot ha ira dughan.
7 Usa han upat nga buhi nga linarang an naghatag ha pito nga anghel hin pito nga yahong nga bulawan nga puno han kasina han Dios,+ nga nabubuhi ha kadayonan, oo ha kadayonan.
8 Ngan an santuaryo napuno hin aso tungod han himaya han Dios+ ngan tungod han iya gahum, ngan waray bisan hin-o nga makakasulod ha santuaryo tubtob nga matapos an pito nga peste+ han pito nga anghel.
