An Pahayag kan Juan 3:1-22
3 “Ha anghel han kongregasyon ha Sardis ini an isurat: Ini an mga butang nga ginsisiring niya nga may-ada han pito nga espiritu han Dios+ ngan han pito nga bitoon:+ ‘Maaram ako han imo mga buhat, nga buhi ka ha ngaran* la, pero an kamatuoran, patay ka.+
2 Magin mabinantayon,+ ngan parig-ona an mga butang nga nahibibilin nga tikamatay na, kay waray ko makita nga an imo mga buruhaton bug-os nga ginbuhat* ha atubangan han akon Dios.
3 Salit padayon nga hunahunaa* kon ano an imo nakarawat ngan kon ano an imo nabatian, ngan padayon nga tumana ito, ngan pagbasol.+ Sigurado nga kon diri ka magmata, makada ako sugad hin kawatan,+ ngan diri ka gud mahibabaro kon ano nga oras ako maabot ngada ha imo.+
4 “‘Bisan pa hito, may pipira nga indibiduwal* dida ha imo ha Sardis nga waray hugawi an ira mga bado,+ ngan maglalakat hira kaupod ko nga nagpakabusag,+ kay takos hira.
5 Salit hiya nga nagdadaog+ magsusul-ot hin busag nga mga bado,+ ngan diri ko gud paparaon an iya ngaran ha libro han kinabuhi,+ lugod kikilalahon ko an iya ngaran ha atubangan han akon Amay ngan ha atubangan han iya mga anghel.+
6 An may talinga mamati ha ginsisiring han espiritu ha mga kongregasyon.’
7 “Ha anghel han kongregasyon ha Filadelfia ini an isurat: Ini an mga butang nga iya ginsisiring, hiya nga baraan,+ hiya nga tinuod,+ hiya nga may-ada han yawi ni David,+ hiya nga nag-aabri basi waray bisan hin-o nga makasara ngan nagsasara basi waray bisan hin-o nga makaabri:
8 ‘Maaram ako han imo mga buhat—kitaa! nag-abri ako hin purtahan ha imo atubangan,+ nga waray bisan hin-o nga makakasara. Ngan maaram ako nga may gutiay ka nga gahum, ngan gintuman mo an akon pulong ngan waray mo gud ignigar an akon ngaran.
9 Kitaa! Adton tikang ha sinagoga ni Satanas nga nasiring nga Judio hira pero diri ngay-an,+ lugod nagbibinuwa—kitaa! pakakadaon ko hira ngan payuyukboon* ha atubangan han imo mga tiil ngan papahibaroon hira nga hinigugma ko ikaw.
10 Tungod kay imo gintipigan an pulong mahitungod han akon pagpailob,*+ titipigan ko liwat ikaw ha oras han pagsari,+ nga maabot ha bug-os nga inuukyan nga tuna, basi sarihan an mga naukoy ha tuna.
11 Maabot ako ha kadagmitan.+ Padayon nga kapti hin marig-on an aada ha imo, basi waray bisan hin-o nga makakuha han imo korona.+
12 “‘Hiya nga nagdadaog—hihimoon ko hiya nga harigi ha templo han akon Dios, ngan diri na gud hiya magawas tikang hito, ngan isusurat ko dida ha iya an ngaran han akon Dios+ ngan an ngaran han syudad han akon Dios, an bag-o nga Jerusalem+ nga nalusad tikang ha langit tikang ha akon Dios, ngan an akon mismo bag-o nga ngaran.+
13 An may talinga mamati ha ginsisiring han espiritu ha mga kongregasyon.’
14 “Ha anghel han kongregasyon ha Laodicea+ ini an isurat: Ini an mga butang nga ginsisiring han Amen,+ an matinumanon ngan tinuod+ nga saksi,+ an tinikangan han paglarang han Dios:+
15 ‘Maaram ako han imo mga buhat, nga diri ka matugnaw ngan diri liwat mapaso. Karuyag ko unta nga matugnaw ka o diri ngani mapaso.
16 Salit tungod kay malanhod ka ngan diri mapaso+ ngan diri liwat matugnaw,+ isusuka ko ikaw.
17 Tungod kay nasiring ka, “Riko ako+ ngan nagkaada hin karikohan ngan diri na nagkikinahanglan hin bisan ano,” pero diri ka maaram nga miserable ka ngan makalolooy ngan pobre ngan buta ngan hubo,
18 ginsasagdonan ko ikaw nga pumalit ha akon hin bulawan nga ginpurog ha kalayo basi ka magriko, ngan hin busag nga mga bado basi may igsul-ot ka ngan an kaarawdan han imo pagkahubo diri maibuhayhag,+ ngan hin tambal ha mata basi ipahid ha imo mga mata+ para ka makakita.+
19 “‘An ngatanan nga akon pinalangga, akon ginsasaway ngan gindidisiplina.+ Salit magin madasigon ngan pagbasol.+
20 Kitaa! Natindog ako ha purtahan ngan nagtutuktok. Kon may bisan hin-o nga makabati han akon tingog ngan mag-abri han purtahan, masulod ako ha iya balay ngan maninihapon kaupod niya ngan hiya kaupod ko.
21 Hiya nga nagdadaog+ akon palilingkuron kaupod ko ha akon trono,+ sugad la nga ako nagdaog ngan liningkod+ kaupod han akon Amay ha iya trono.
22 An may talinga mamati ha ginsisiring han espiritu ha mga kongregasyon.’”
Mga footnote
^ O “reputasyon.”
^ O “nakompleto.”
^ O “hinumdumi.”
^ Lit., “pipira nga ngaran.”
^ O “pahahatagon hin katalahoran.”
^ O posible nga “ginsunod an ehemplo han akon pagpailob.”
