An Pahayag kan Juan 4:1-11
4 Katapos hini nakita ko, ngan kitaa! usa nga abrido nga purtahan ha langit, ngan an siyahan nga tingog nga akon nabatian nga nakikiistorya ha akon pariho han tunog hin trumpeta, nga nasiring: “Saka ngadi, ngan ipapakita ko ha imo an mga butang nga kinahanglan mahitabo.”
2 Kahuman hini, nahiilarom dayon ako han gahum han espiritu, ngan kitaa! may trono nga aada ha hinmumutangan hito ha langit, ngan may nalingkod ha trono.+
3 Ngan Hiya nga nalingkod pariho pagkit-on hin bato nga haspe+ ngan hin bato nga sardio,* ngan ha palibot han trono may balangaw nga pariho pagkit-on hin esmeralda.+
4 Ha palibot han trono may-ada 24 nga trono, ngan hini nga mga trono nakita ko nga may nalingkod nga 24 nga tigurang+ nga nakasul-ot hin busag nga mga bado, ngan ha ira ulo may bulawan nga korona.
5 Tikang ha trono nagawas an mga kidlat+ ngan mga tingog ngan mga dalugdog;+ ngan may pito nga dagku nga lampara nga may naglalaga nga kalayo ha atubangan han trono, ngan nangangahulogan ini han pito nga espiritu han Dios.+
6 Ha atubangan han trono may sugad hin dagat nga salaming,+ nga pariho hin kristal.
Ha butnga han trono* ngan ha palibot han trono may upat nga buhi nga linarang+ nga puno hin mga mata ha atubangan ngan ha luyo.
7 An siyahan nga buhi nga linarang pariho hin leon,+ ngan an ikaduha nga buhi nga linarang pariho hin turilyo nga baka,+ ngan an ikatulo nga buhi nga linarang+ may nawong nga pariho hin kanan tawo, ngan an ikaupat nga buhi nga linarang+ pariho hin agila nga nalupad.+
8 Mahitungod han upat nga buhi nga linarang, an tagsa ha ira may unom nga pako; puno ito hin mga mata ha palibot ngan ha ilarom.+ Ngan ha adlaw ngan gab-i padayon hira nga nasiring: “Baraan, baraan, baraan hi Jehova*+ nga Dios, an Makagarahum-ha-ngatanan, nga amo hadto ngan amo yana ngan an maabot.”+
9 Ha kada panahon nga an buhi nga mga linarang naghahatag hin himaya ngan dungog ngan pagpasalamat ha Dios nga nalingkod ha trono, ha Dios nga nabubuhi ha kadayonan, oo ha kadayonan,+
10 an 24 nga tigurang+ naluhod nga nahapa ha atubangan han Dios nga nalingkod ha trono, ngan nagsisingba ha Dios nga nabubuhi ha kadayonan, oo ha kadayonan, ngan ira gin-iitsa an ira korona ha atubangan han trono, nga nasiring:
11 “Takos ka, Jehova* nga amon Dios, ha pagkarawat han himaya+ ngan han dungog+ ngan han gahum,+ kay ikaw an naglarang han ngatanan nga butang,+ ngan tungod han imo kaburut-on ineksister hira ngan ginlarang.”
