Mga Proberbios 9:1-18
9 An tinuod nga kinaadman nagtukod han iya balay;Iya gintabas an iya pito nga harigi.
2 Iya ginpreparar hin maopay an iya karne;*Iya ginbutangan hin halo an iya bino;Iya liwat gin-andam an iya lamesa.
3 Iya ginsugo an iya mga surugoon nga babaye
Basi magtawag tikang ha higtaas nga mga lugar ha bawbaw han syudad:+
4 “Pakadia an bisan hin-o nga waray eksperyensya.”
Nasiring hiya ha tawo nga waray maopay nga panhunahuna:*
5 “Kadi, kaona an akon tinapayNgan saro ha pag-inom han bino nga akon ginbutangan hin halo.
6 Bayai an imo kawaray-eksperyensya* basi ka mabuhi;+Lakat hin diretso ha dalan han pagsabot.”+
7 An tawo nga nagtatadong hin paratamay makakakarawat hin kaarawdan,+Ngan an bisan hin-o nga nagsasaway hin maraot nga tawo maaalohan.
8 Ayaw sawaya an paratamay, kay sigurado nga mangangalas hiya ha imo.+
Sawaya an maaramon nga tawo, ngan hihigugmaon ka niya.+
9 Paghatag ha maaramon nga tawo, ngan magigin mas maaramon hiya.+
Tutdui an matadong nga tawo, ngan madudugangan an iya nahibabaroan.
10 An kahadlok kan Jehova amo an tinikangan han kinaadman,+Ngan an kahibaro mahitungod ha Pinakabaraan nga Dios amo an pagsabot.+
11 Kay pinaagi ha akon an imo mga adlaw magdadamu,+Ngan an mga tuig han imo kinabuhi madudugangan.
12 Kon magin maaramon ka, ikaw mismo an magpapahimulos hito,Pero kon paratamay ka, ikaw la gihapon an mag-aantos hito.
13 An lurong nga babaye maaringasa.+
Ignorante hiya ngan waray gud hinbabaroan.
14 Nalingkod hiya ha aragian tipasulod ha iya balayHa lingkoran dida ha higtaas nga mga lugar han syudad,+
15 Nga nagtatawag ha mga nalabay,Ha mga nalakat hin diretso ha ira dalan:
16 “Pakadia an bisan hin-o nga waray eksperyensya.”
Nasiring hiya ha mga tawo nga waray maopay nga panhunahuna:*+
17 “Matam-is an kinawat nga tubig,Ngan marasa an pagkaon nga ginkakaon hin sekreto.”+
18 Pero diri hira maaram nga aadto didto an mga patay,Nga an iya mga bisita aadto ha kahiladman han Lubnganan.*+
Mga footnote
^ Lit., “Gin-ihaw niya an iya irihawon.”
^ O “nga an kasingkasing waray maopay nga pagturotimbang.”
^ O “an mga tawo nga waray eksperyensya.”
^ O “nga an kasingkasing waray maopay nga pagturotimbang.”
