An Surat ni Santiago 4:1-17
4 Ano an gintitikangan han iyo mga girra ngan mga araway? Diri ba nagtitikang ito ha iyo unudnon nga mga hingyap nga nag-aaraway ha sulod niyo?*+
2 Naghihingyap kamo, pero waray kamo nakakarawat. Padayon kamo nga nanmamatay ngan naiipa, pero diri kamo nakakakuha. Padayon kamo nga nag-aaraway ngan naggigirra.+ Waray kamo nakakarawat kay diri kamo nangangaro.
3 Kon nangangaro kamo, waray kamo nakakarawat kay nangangaro kamo nga may sayop nga katuyoan, basi gamiton niyo ito ha iyo unudnon nga mga hingyap.
4 Mga nag-aadulteryo,* diri ba kamo maaram nga an pakigsangkay ha kalibotan pakig-away ha Dios? Salit an bisan hin-o nga karuyag magin sangkay han kalibotan naghihimo han iya kalugaringon nga kaaway han Dios.+
5 O ha iyo ba paghunahuna waray hinungdan an kasuratan ha pagsiring: “An disposisyon nga aadi ha aton padayon nga naghihingyap nga may kaawa”?+
6 Pero mas labaw an diri matupngan nga pagkabuotan nga Iya iginhahatag. Salit ito nasiring: “An Dios nakontra ha mga mapahitas-on,+ kondi gintatagan niya hin diri matupngan nga pagkabuotan an mga mapainubsanon.”+
7 Salit magpasakop kamo ha Dios;+ pero atohi an Yawa,+ ngan mapalagiw hiya ha iyo.+
8 Magin duok ha Dios, ngan magigin duok hiya ha iyo.+ Limpyuhi an iyo mga kamot, kamo nga mga makasasala,+ ngan putlia an iyo kasingkasing,+ kamo nga mga maruhaduhaon.
9 Pabay-i nga makaeksperyensya kamo hin kasakitan ngan kabidoan ngan pagtangis.+ An iyo katatawa saliwani hin kabido, ngan an iyo kalipay saliwani hin kasubo.
10 Magpaubos kamo ha atubangan ni Jehova,*+ ngan iya kamo pahihitas-on.+
11 Mga kabugtoan, ayaw na kamo pagyakan kontra ha usa kag usa.+ An bisan hin-o nga nagyayakan kontra ha usa nga bugto o naghuhukom ha iya bugto nagyayakan kontra ha balaud ngan naghuhukom ha balaud. Yana kon naghuhukom ka ha balaud, diri ka magburuhat han balaud kondi usa nga hukom.
12 May usa la nga Parahatag hin balaud ngan Hukom,+ hiya nga nakakatalwas ngan nakakabungkag.+ Pero ikaw, hin-o ka para maghukom ha imo igkasi-tawo?+
13 Yana kadi, kamo nga nasiring: “Yana nga adlaw o buwas magbibiyahe kita pakadto hini nga syudad ngan maukoy didto hin usa ka tuig, ngan magninegosyo kita ngan magpapaganansya,”+
14 pero diri kamo maaram kon ano an iyo magigin kinabuhi buwas.+ Kay alisngaw kamo nga nakikita hin madaliay ngan katapos nawawara.+
15 Lugod, angay kamo sumiring: “Kon kaburut-on ni Jehova,*+ mabubuhi kita ngan bubuhaton ini o ito.”
16 Pero yana nagpapahitaas kamo samtang duro nga naghihinambog. An ngatanan nga sugad hito nga paghinambog maraot.
17 Salit kon an usa maaram ha pagbuhat han husto pero diri niya ito ginbubuhat, sala ito niya.+
