Surat kan Tito 2:1-15
2 Pero ikaw, magpadayon ka ha pagyakan han uyon ha maopay* nga katutdoan.+
2 An edaran nga kalalakin-an sadang magin kontrolado an pamatasan, seryoso, maopay an panhunahuna, mahimsog an pagtoo, mahigugmaon, ngan mapailubon.
3 Sugad man an edaran nga kababayin-an sadang magin dungganon an panggawi, diri parapakaraot, diri uripon hin damu nga bino, mga magturutdo han kaopayan,
4 basi ira masagdonan* an burobata nga kababayin-an nga higugmaon an ira bana, higugmaon an ira mga anak,
5 magin maopay an panhunahuna, putli, nagtatrabaho ha panimalay,* maopay, nagpapasakop ha ira bana,+ basi an pulong han Dios diri pagyaknan hin maraot.
6 Sugad man, padayon nga aghata an burobata nga kalalakin-an nga magin maopay an panhunahuna,+
7 nga iginpapakita an imo kalugaringon sugad nga susbaranan ha mag-opay nga mga buhat ha ngatanan nga paagi. Seryoso gud nga itutdo kon ano an putli,*+
8 nga nagamit hin mag-opay* nga mga pulong nga waray maiyayakan nga maraot,+ basi mahibutang ha kaarawdan an mga nakontra, kay waray hira negatibo* nga masisiring mahitungod ha aton.+
9 An mga uripon sadang magpasakop ha ira mga agaron ha ngatanan nga butang,+ nga nangangalimbasog nga lipayon hira, diri mabaton-baton,
10 diri nangangawat ha ira,+ lugod nagpapakita nga bug-os nga matataporan hira, basi ha ngatanan nga paagi maadornohan nira an katutdoan han aton Paratalwas, an Dios.+
11 Kay iginpakita han Dios an iya diri matupngan nga pagkabuotan nga naghahatag hin katalwasan ha ngatanan nga klase hin tawo.+
12 Nagbabansay ito ha aton nga isalikway an pagin diri diosnon ngan an kalibotanon nga mga hingyap+ ngan magkinabuhi nga may maopay nga panhunahuna ngan pagkamatadong ngan debosyon ha Dios dinhi hini nga presente nga sistema han mga butang,*+
13 samtang ginhuhulat naton an makalilipay nga paglaom+ ngan mahimayaon nga pagpadayag han harangdon nga Dios ngan han aton Paratalwas, hi Jesu-Kristo,
14 nga naghatag han iya kalugaringon para ha aton+ basi tagan kita hin kagawasan*+ ha ngatanan nga klase han pagkamatinalapason ngan basi limpyohan kita para magin iya kalugaringon nga katawohan nga iya espesyal nga panag-iya, nga madasigon ha mag-opay nga mga buhat.+
15 Padayon nga isumat ini nga mga butang ngan magsagdon* ka ngan magsaway nga may bug-os nga awtoridad.+ Ayaw pabay-i nga minuson ka han bisan hin-o.
Mga footnote
^ O “makapahimsog; mapulsanon.”
^ O “mabuligan nga makapamurubuot; mabansay.”
^ O “nanginginano ha ira panimalay.”
^ O posible nga “pagtutdo nga may kaputli.”
^ O “makapahimsog; mapulsanon.”
^ O “maraot.”
^ Lit., “basi lukaton kita; basi tubuson kita.”
^ O “magdasig.”
