Zacarias 3:1-10
3 Ngan iginpakita niya ha akon hi Josue+ nga hitaas nga saserdote nga natindog ha atubangan han anghel ni Jehova, ngan hi Satanas+ natindog ha iya too basi kontrahon hiya.
2 Katapos, an anghel ni Jehova nagsiring kan Satanas: “Sawayon ka unta ni Jehova, O Satanas,+ oo, sawayon ka unta ni Jehova, nga nagpili han Jerusalem!+ Diri ba ini usa nga nasusunog nga kahoy nga ginrabot tikang ha kalayo?”
3 Yana, maghugaw nga mga bado an sul-ot ni Josue, ngan natindog hiya ha atubangan han anghel.
4 An anghel nagsiring ha mga natindog ha iya atubangan, “Hukasa an iya maghugaw nga mga bado.” Katapos, nagsiring hiya ha iya, “Kitaa, akon ginkuha an imo sayop,* ngan susul-otan ka hin mag-opay nga mga bado.”*+
5 Salit ako nagsiring: “Sul-uti hiya hin malimpyo nga putos ha ulo.”+ Ngan ira hiya ginsul-otan hin malimpyo nga putos ha ulo ngan ginsul-otan hiya hin mga bado; ngan an anghel ni Jehova natindog ha hirani.
6 Katapos, an anghel ni Jehova nagsiring kan Josue:
7 “Ini an siring ni Jehova han mga hugpo, ‘Kon maglakat ka ha akon mga dalan ngan tumanon mo an imo mga responsabilidad ha akon atubangan, kon sugad magigin usa ka nga hukom ha akon balay+ ngan manginginano* han akon mga bungsaran; ngan tutugotan ko ikaw nga makadaop kaupod hini nga mga natindog dinhi.’
8 “‘Alayon pamati, O Josue nga Hitaas nga Saserdote, ikaw ngan an imo mga kaupod nga nalingkod ha imo atubangan, kay ini nga mga lalaki magigin tigaman; kitaa! akon iginpapakilala an akon surugoon+ nga hi Saha!+
9 Kitaa an bato nga akon iginbutang ha atubangan ni Josue! Ha usa nga bato may pito nga mata; ngan may gin-uukit ako nga mga pulong dida hito,’ nasiring hi Jehova han mga hugpo, ‘ngan akon kukuhaon an pagin salaan hito nga tuna ha usa ka adlaw.’+
10 “‘Hito nga adlaw,’ nasiring hi Jehova han mga hugpo, ‘an kada tagsa ha iyo mag-iimbitar han iya amyaw nga kumadto ha ilarom han iyo tanom nga ubas ngan ha ilarom han iyo kahoy nga igos.’”+
Mga footnote
^ O “pagin salaan.”
^ O “hin higlaba nga mga bado para ha espesyal nga okasyon.”
^ O “magdudumara; magbabantay.”
