Zacarias 4:1-14
4 An anghel nga nagpinakiistorya ha akon binalik ngan ginpukaw ako, pariho ha pagpukaw hin tawo nga nakaturog.
2 Katapos, nagsiring hiya ha akon: “Ano an imo nakikita?”
Salit nagsiring ako: “Nakikita ko, ngan kitaa! usa nga burutangan han lampara nga puro nga bulawan,+ nga may yahong ha bawbaw hito. May pito nga lampara dida hito,+ oo, pito, ngan an mga lampara nga aada ha bawbaw hito may pito nga tubo.
3 Ngan ha sapit hito may duha nga kahoy nga olibo,+ usa ha too han yahong ngan usa ha wala.”
4 Katapos, ginpakianhan ko an anghel nga nakikiistorya ha akon: “Ginoo ko, ano an karuyag sidngon hini nga mga butang?”
5 Salit an anghel nga nakikiistorya ha akon nagpakiana: “Diri ka ba maaram kon ano an karuyag sidngon hini nga mga butang?”
Binaton ako: “Diri, ginoo ko.”
6 Katapos, nagsiring hiya ha akon: “Ini an pulong ni Jehova kan Zerubabel: ‘“Diri pinaagi hin pwersa militar, diri liwat pinaagi hin gahum,+ kondi pinaagi han akon espiritu,”+ nasiring hi Jehova han mga hugpo.
7 Hin-o ka, O daku nga bukid? Ha atubangan ni Zerubabel+ ikaw magigin patag nga tuna.*+ Ngan iya kukuhaon an bato ha pungkay* hito samtang naguliat hin: “Makaruruyag gud! Makaruruyag gud!”’”
8 An pulong ni Jehova inabot utro ha akon, nga nasiring:
9 “An mga kamot ni Zerubabel an nagpahamutang han pundasyon hini nga balay,+ ngan an iya mismo mga kamot an magtatapos hito.+ Ngan mahibabaro gud kamo nga hi Jehova han mga hugpo an nagsugo ha akon nga kumanhi ha iyo.
10 Kay hin-o an nagtamay han adlaw han gutiay nga tinikangan?*+ Kay magrarayhak hira ngan makita han tunton* ha kamot ni Zerubabel. Ini nga pito amo an mga mata ni Jehova nga nagkikita ngadto-nganhi ha bug-os nga tuna.”+
11 Katapos, nagpakiana ako ha iya: “Ano an kahulogan hini nga duha nga kahoy nga olibo ha too ngan ha wala han burutangan han lampara?”+
12 Nagpakiana ako ha iya ha ikaduha nga higayon: “Ano an kahulogan han duha ka butok nga mga sanga* han mga kahoy nga olibo nga nag-aawas han likido nga sugad hin bulawan pinaagi han duha nga tubo nga bulawan?”
13 Salit nagpakiana hiya ha akon: “Diri ka ba maaram kon ano an karuyag sidngon hini nga mga butang?”
Binaton ako: “Diri, ginoo ko.”
14 Hiya nagsiring: “Amo ini an duha nga dinihogan nga natindog ha sapit han Ginoo han bug-os nga tuna.”+
Mga footnote
^ O “bato ha bawbaw.”
^ O “kapatagan.”
^ O “gutiay nga mga butang?”
^ Lit., “han bato, han lata.”
^ Karuyag sidngon, mga sanga han kahoy nga puno hin bunga.