Zacarias 5:1-11
5 Hinangad ako utro ngan nakakita ako hin nalupad nga linukot nga basahon.
2 Nagpakiana hiya ha akon: “Ano an imo nakikita?”
Binaton ako: “May nakikita ako nga nalupad nga linukot nga basahon, nga 20 ka siko* an kahilaba ngan 10 ka siko an kahilapad.”
3 Katapos, nagsiring hiya ha akon: “Ini an sumpa para ha bawbaw han bug-os nga tuna, kay an ngatanan nga nangangawat,+ sugad han iginsurat ha usa nga bahin hito, waray siruti; ngan an ngatanan nga nanunumpa,+ sugad han iginsurat ha luyo nga bahin hito, waray siruti.
4 ‘Iginpadara ko ito,’ nasiring hi Jehova han mga hugpo, ‘ngan masulod ito ha balay han kawatan ngan ha balay han nanunumpa hin buwa ha akon ngaran; ngan magpapabilin ito ha sulod hito nga balay ngan bubungkagon ito ngan an mga kahoy hito ngan mga bato hito.’”
5 Katapos, an anghel nga nakikiistorya ha akon hinirani ngan nagsiring ha akon: “Alayon paghangad, ngan kitaa kon ano an nagawas.”
6 Salit nagpakiana ako: “Ano ito?”
Binaton hiya: “Ini an epah nga surudlan* nga nagawas.” Nagsiring pa hiya: “Ini an ira hitsura ha bug-os nga tuna.”
7 Ngan nakita ko nga gin-alsa an malidong nga takop nga tingga, ngan may babaye nga nalingkod ha sulod han surudlan.
8 Salit nagsiring hiya: “Amo ini an Karaotan.” Katapos, iya iginduso an babaye ha sulod han epah nga surudlan, kahuman, an mabug-at nga tingga iya igintakop ha ganggang hito.
9 Katapos, hinangad ako ngan nakakita ako hin duha nga babaye nga inulpot, ngan nalupad hira ha hangin. May mga pako hira nga pariho han mga pako han sigwenya. Ngan gin-alsa nira an surudlan butnga han tuna ngan langit.
10 Salit nagpakiana ako ha anghel nga nakikiistorya ha akon: “Ngain nira dadad-a an epah nga surudlan?”
11 Binaton hiya: “Ha tuna han Sinar*+ basi tukoran hiya hin balay; ngan kon andam na ito, ibubutang hiya didto ha iya husto nga lugar.”
Mga footnote
^ Lit., “an epah,” dinhi nagtutudlok ha surudlan o basket nga ginagamit ha pagtakos hin epah. An usa ka epah katugbang han 22 L. Kitaa an Ap. B14.
^ Karuyag sidngon, an Babilonya.