Ha Martes, Abril 11, damu nga diri-aktibo nga Kristiano an matambong ha Memoryal. Nagtikang hira ha rumba para han kinabuhi kondi naghinay tungod han iba-iba nga rason, nga an pipira ginhihisgotan ha brosyur nga Balik kan Jehova. (Heb 12:1) Pero ini nga mga diri-aktibo presyoso la gihap kan Jehova, nga nagtubos ha ira pinaagi han dugo han iya Anak. (Bu 20:28; 1Pe 1:18, 19) Paonan-o naton mabubuligan hira nga bumalik ha kongregasyon?

Nangangalimbasog an mga tigurang ha pagbiling ngan pagbulig ha diri-aktibo nga mga Kristiano sugad hin magbarantay nga nangangalimbasog pagbiling han karnero nga nahibulag ha panon. (Lu 15:4-7) Nagpapakita ini han gugma ni Jehova. (Jer 23:3, 4) Kita ngatanan, diri la an mga tigurang, mahimo magdasig ha ira. An aton pangalimbasog nga magin buotan ngan magin matinagaron nakakapalipay kan Jehova ngan may balos. (Pr 19:17; Bu 20:35) Salit hunahunaa kon hin-o an mahimo mo dasigon, ngan ayaw paglangan ha pagbuhat hito!

KITAA AN VIDEO NGA DASIGA AN MGA DIRI-AKTIBO, NGAN HISGUTI AN MASUNOD:

• Ano an ginhimo ni Abbey han may nakaistorya hiya nga Saksi nga diri niya kilala?

• Kay ano nga sadang naton sumatan an mga tigurang kon naghuhunahuna kita pagbulig ha usa nga diri-aktibo?

• Paonan-o nangandam hi Abbey ha pagbisita utro kan Laura?

• Paonan-o iginpakita ni Abbey an pagin determinado, pagin mapailubon, ngan gugma samtang iya gindadasig hi Laura?

• Ano an aton mahibabaroan tikang ha ilustrasyon ni Jesus ha Lucas 15:8-10?

• Ano an mga bendisyon han urosa nga pangalimbasog ha pagbulig kan Laura?