Han priso hira Pablo ngan Silas, gindayaw nira an Dios pinaagi hin kanta. (Bu 16:25) Ha moderno nga panahon, nagkanta hin mga kanta han Ginhadian an aton mga igkasi-tumuroo samtang priso ha Sachsenhausen han Nazi ha Alemanya ngan samtang distyero ha Siberia. Nagpapakita ini nga daku an nahihimo han kanta ha paghatag hin kaisog ha mga Kristiano nga naatubang hin pagsari.

Damu pa nga yinaknan an magkakaada han bag-o nga songbook nga “Sing Out Joyfully” to Jehovah. Kon magkaada na kita kopya, mahimo naton mamemorya an mga liriko hito pinaagi ha pagpraktis durante han family worship. (Efe 5:19) Katapos, an baraan nga espiritu mabulig ha aton nga mahinumdoman ito kon may mga pagsari. An mga kanta han Ginhadian makakabulig ha aton nga magpokus ha aton paglaom. Mahimo ito maghatag ha aton hin kusog basi makapadayon kon may mga pagsari. Ngan kon maopay an aton pag-abat, an makaparig-on nga liriko mag-aaghat ha aton nga magkanta nga may kalipay tungod han maopay nga kahimtang han aton kasingkasing. (1Kr 15:16; Sal 33:1-3) Salit pahimulsan gud naton an mga kanta han Ginhadian!

KITAA AN VIDEO NGA KANTA NGA NAGHATAG HIN KAISOG HA MGA PRISO, KATAPOS BATONA AN MASUNOD:

• Ano an nakaaghat kan Bugto Frost ha pagkomposo hin kanta?

• Paonan-o nadasig han kanta an kabugtoan ha prisohan han Sachsenhausen?

• Ha ano nga kahimtang han adlaw-adlaw nga pagkinabuhi mahimo ka maparig-on han mga kanta han Ginhadian?

• Ano nga mga kanta han Ginhadian an karuyag mo memoryahon?