Tikang yana nga tuig, magkakaada kita dugang nga panahon ha pagpangandam para ha Memoryal han kamatayon han Kristo. Kon an Memoryal mahituman ha Lunes tubtob Biernes, waray pagdudumarahon nga Katirok ha Pagkinabuhi ngan Ministeryo hito nga semana. Kon an Memoryal mahituman ha kataposan han semana, waray pahayag publiko ngan Pag-aram ha Barantayan. Gagamiton mo ba hin maopay an imo dugang nga panahon? Sugad la han siyahan nga siglo, kinahanglan maghimo hin praktikal nga mga kahikayan para hinin espesyal nga okasyon. (Lu 22:7-13; km 3/15 1) Pero kinahanglan andamon naton ngatanan an aton kasingkasing. Paonan-o naton ini mahihimo?

• Pamalandonga an pagkaimportante han pagtambong.​—1Co 11:23-26

• Ig-ampo ngan usisaha an imo personal nga relasyon kan Jehova.​—1Co 11:27-29; 2Co 13:5

• Basaha ngan pamalandonga an mga teksto ngan artikulo nga naghihisgot han kahulogan han Memoryal.​—Ju 3:16; 15:13

May mga magwarali nga nagbabasa ngan namamalandong ha nakaeskedyol nga pagbasa han Biblia ha Memoryal nga makikita ha Pag-usisa han Kasuratan Adlaw-adlaw. Ginbabasa naman han iba an mga teksto nga makikita ha tsart ha ubos. May iba liwat nga nagrirepaso han mga artikulo han Barantayan nga naghihisgot han Memoryal ngan han gugma nga iginpakita ni Jehova ngan ni Jesus ha aton. Anoman nga paagi an imo pilion, hinaot makabulig ito nga magin mas duok ka kan Jehova ngan ha iya Anak.