Maaram hi Jacob nga hi Jehova la an angay kumarawat han eksklusibo nga debosyon, bisan kon waray pa Hiya maghatag hin balaud kontra ha idolatriya. (Ex 20:3-5) Salit han ginpabalik ni Jehova hi Jacob ha Bethel, ginsugo ni Jacob an ngatanan niya nga kaupod nga panguhaon an ira mga idolo. Katapos, iginlubong niya an mga idolo, upod na an mga ariyos nga posible gin-gamit sugad nga anting-anting. (Ge 35:1-4) Sigurado nga nalipay hi Jehova ha ginbuhat ni Jacob.

Paonan-o naton maihahatag kan Jehova yana an aton eksklusibo nga debosyon? Kinahanglan naton likyan an bisan ano nga konektado ha idolatriya ngan espiritismo. Nag-uupod ini ha pagwara han mga butang nga konektado ha espiritismo ngan pag-usisa hin maopay han aton mga kaliawan. Pakianhi an imo kalugaringon: ‘Nag-i-enjoy ba ako ha mga libro o salida mahitungod ha mga bampira, zombie, o mga diri sugad ha aton? An akon ba kaliawan nagpapakita nga an madyik, panlumay, o sumpa diri nakakadaot?’ Kinahanglan likyan naton an mga butang nga ginkakangalasan ni Jehova.​—Sal 97:10.

KITAA AN VIDEO NGA “ATOHI AN YAWA,” NGAN BATONA AN MASUNOD:

• Ano an nagin problema han Bible study nga hi Palesa?

• Kay ano nga maaramon an pangaro hin bulig ha mga tigurang kon ginsisinamok ka o an imo kakilala han magraot nga espiritu?

• Basi makarawat an panalipod ni Jehova, ano nga mga butang an kinahanglan naton wad-on?

• Ano an ginbuhat dayon ni Palesa?

• Ano an komon nga ginbubuhat han mga tawo ha iyo lugar basi malikyan an impluwensya han mga demonyo, ngan paonan-o mo ito malilikyan?