Tikang ha Septyembre, magkakaada bag-o nga sampol nga presentasyon ha aton Workbook Para ha Katirok ha Pagkinabuhi Ngan Ministeryo nga may ulohan, “Igtutdo an Kamatuoran.” An aton tumong amo an pagsumat hin usa nga nangunguna nga kamatuoran tikang ha Biblia gamit an usa nga pakiana ngan teksto.

Kon makita naton nga may interes an aton kaistorya, maaaghat naton hiya nga pamulaton an aton sunod nga pagbisita pinaagi ha pagbilin hin publikasyon o ha pagpakita hin video ha jw.org. Sadang kita bumalik ha sulod la hin pipira ka adlaw basi dugang nga makultibar an interes ha naglabay nga paghisgot. An bag-o nga mga presentasyon ngan mga toka han estudyante ibabasar ha mga topiko ha Igintututdo han Biblia nga libro. Ha kahon han tagsa nga kapitulo makikita an dugang nga mga teksto nga mabulig ha aton ha pagbalik-bisita o pagdumara hin pag-aram nga Biblia la an gamit.

Usa la an dalan nga nagtutugway ha kinabuhi. (Mat 7:13, 14) Tungod kay an aton mga nakakaistorya tikang ha iba-iba nga relihiyon ngan kultura, an mga kamatuoran ha Biblia nga aton ipipresentar sadang magin makapainteres ha ira sugad nga indibiduwal. (1Ti 2:4) Samtang nadudugangan an aton kahibaro ha iba-iba nga topiko ha Biblia ngan nag-uuswag an aton abilidad ha ‘pagtutdo ngan pagsaysay han pulong han kamatuoran ha husto nga paagi,’ mas magigin malipayon kita ngan maglalampos ha pagtutdo han kamatuoran ha iba.—2Ti 2:15.