Ha giniyahan nga surat ni apostol Pablo kan Tito, nagsiring hiya nga an batan-on nga kalalakin-an, upod na hi Tito, kinahanglan maningkamot basi magin “susbaranan ha mag-opay nga mga buhat ha ngatanan nga paagi.” (Tit 2:6, 7) Ha pariho nga kapitulo, iginpakita niya nga an katawohan ni Jehova ginlimpyohan na basi magin “madasigon [hira] ha mag-opay nga mga buhat.” (Tit 2:14) An usa hito nga mag-opay nga buhat amo an pagsangyaw ngan pagtutdo mahitungod ha Ginhadian han Dios. Kon usa ka nga batan-on, puydi mo ba gamiton an imo kusog ha pag-auxiliary o pagregular payunir?​—Pr 20:29.

Kon karuyag mo magin payunir, magkaada reyalistiko nga mga plano basi makab-ot ito. (Lu 14:28-30) Pananglitan, paonan-o mo masusuportaran an imo kalugaringon samtang nag-aalagad ka hin bug-os-panahon? Paonan-o mo makukuha an ginkikinahanglan nga oras? Ig-ampo kan Jehova an imo kahimtang. (Sal 37:5) Ipakiistorya an imo mga plano ha imo mga kag-anak ngan ha malampuson nga mga payunir. Katapos, paghimo hin mga pitad basi makab-ot an imo tumong. Sigurado nga bibendisyonan ni Jehova an imo mga paningkamot ha pag-alagad ha iya!

KITAA AN VIDEO NGA MGA BATAN-ON NGA NAGPAPASIDUNGOG KAN JEHOVA, NGAN BATONA AN MASUNOD:

• Ano nga mga ayat an nalamposan han pipira basi makagpayunir, ngan paonan-o nira ginbuhat ito?

• Ano an maibubulig han mga kag-anak basi magin regular payunir an ira mga anak?

• Kay ano nga importante an pagkaada eskedyol ha pagsangyaw?

• Ano an mahihimo han mga membro han kongregasyon basi maparig-on ngan mabuligan an usa nga payunir?

• Ano nga mga bendisyon an nakakarawat han mga payunir?