Tikang han 2018, usa la nga topiko ha kada isyu an ginhihisgotan han aton panpubliko nga mga magasin. Ini ngatanan nga magasin makikita ha aton Toolbox ha Pagpanutdo. Salit puydi naton ini gamiton ha aton ministeryo. Puydi liwat kita magdara hini ha aton pagbiyahe o pamalit. An mga magasin diri nakadisenyo para gamiton ha pag-aram han Biblia ha mga tawo, pero mahimo hini mapukaw an ira interes ha espirituwal.

Kon makatikang ka na hin pakiistorya, pagbasa hin teksto ngan pag-unabi hin topiko han magasin nga bangin makapainteres ha imo kaistorya. Pananglitan, kon pamilyado hiya o namatayan o naiistres, puydi ka sumiring: “May nabasa ako nga maopay nga artikulo may kalabotan hito. Puydi ko ba ito ipakita ha imo?” Kon interesado hiya, puydi mo hiya tagan hin inimprinta nga magasin o hin elektroniko nga kopya hito, bisan ha siyahan pa la nga pag-istorya. Bisan kon an pagpanaltag hin literatura diri amo an aton nangunguna nga tumong, an mga magasin makakabulig basi mabilngan naton an mga tawo nga andam mag-aplikar han ira nahibabaroan.​—Bu 13:48.