Handurawa nga ha Galilea ka naukoy ha panahon ni Jesus. Nabiyahe ka tikadto ha Jerusalem basi isaurog an Piyesta han mga Payag. An syudad puno han imo igkasi-magsiringba tikang ha higrayo nga lugar. Karuyag mo maghalad kan Jehova. Samtang nagtutugway hin kanding, nagbinaktas ka ha matawo ngan haligot nga aragian tipakadto ha templo. Pag-abot mo ha templo, puno ito hin iba pa nga karuyag liwat maghalad. Katapos, turno mo na nga ihatag an kanding ha mga saserdote. Hito nga takna, nahinumdoman mo nga an imo bugto, nga posible aada ha templo o aadto ha syudad, may reklamo ha imo. Iginsaysay ni Jesus kon ano an imo sadang buhaton. (Basaha an Mateo 5:24.) Sumala han iginsugo ni Jesus, ano an sadang mo buhaton ngan han imo napasubo nga bugto basi maibalik an iyo maopay nga relasyon? Ha tagsa nga rumbay ha ubos, butangi hin tsek an husto nga baton.

AN SADANG MO BUHATON

• Pakiistorya la ha imo bugto kon para ha imo may makatadunganon hiya nga rason nga masina

• Pangalimbasugi nga tadungon an panhunahuna han imo bugto kon para ha imo sobra la hiya ka sensitibo o angay liwat hiya basulon ha nahitabo

• Mapailubon nga pamatii an imo bugto, ngan bisan kon diri mo bug-os nga nasasabtan, sinsero nga pangaro hin pasaylo tungod han kasakit nga iya gin-abat o tungod han diri tinuyo nga epekto han imo nabuhat

AN SADANG BUHATON HAN IMO BUGTO

• Mangalimbasog nga makuha an simpatiya han iba ha kongregasyon pinaagi ha pagsinumat ha ira nga nakasala ka ha iya

• Mag-isog ha imo ngan usa-usahon an imo nabuhat nga sayop ngan obligaron ka nga karawaton an imo sayop

• Karawaton an pagpaubos ngan kaisog nga imo ginhimo ha pagdaop ha iya ngan kinasingkasing nga pasayloon ka

Bisan kon diri nagkikinahanglan hin halad nga hayop an aton pag-alagad yana, ano an igintutdo ni Jesus may kalabotan ha epekto han aton pakigmurayaw ha aton bugto ha pagsingba nga kinakarawat han Dios?