Ginagamit naton hin maaramon an aton kusog kon nagkakab-ot kita hin espirituwal nga mga tumong. (1Co 9:26) An mga tumong nabulig ha aton nga gamiton ha pinakamaopay nga paagi an nabibilin nga panahon antes an kataposan hini nga sistema. (Efe 5:15, 16) Ha iyo pagsingba han pamilya, kay ano nga diri maghimo hin mga tumong para ha tiarabot nga tuig han pag-alagad? Basi mabuligan kamo, ini nga isyu han workbook para ha katirok may mga artikulo mahitungod han pipira nga mga tumong nga mahimo niyo igkonsiderar ngan ig-ampo.—San 1:5.

Pananglitan, pinaagi han kooperasyon han ngatanan ha pamilya, puydi ba makagregular payunir bisan an usa la nga membro han pamilya? Kon diri ka sigurado kon maaabot mo an ginkikinahanglan nga oras, pakiistorya ha pipira nga payunir nga pariho ha imo an sitwasyon. (Pr 15:22) Bangin puydi ka pa ngani mag-interbyu hin payunir ha iyo pagsingba han pamilya. Katapos, paghimo hin eskedyol. Kon payunir ka hadto, ikonsiderar kon igintutugot na ba han imo kahimtang yana nga magpayunir.

Puydi ba makag-auxiliary payunir hin usa ka bulan o sobra pa an pipira nga membro han iyo pamilya? Kon limitado na an imo kusog, bangin mahimo ka makag-auxiliary payunir pinaagi ha paggahin hin gutiay nga oras kada adlaw ha ministeryo. Kon limitado an imo panahon ha pagministeryo ha Lunes tubtob Biernes tungod kay nagtatrabaho ka hin full-time o naeskwela, bangin puydi ka magpili hin bulan nga may holiday o may lima nga Sabado ngan Domingo. Ha kalendaryo, markahi kon san-o mo plano mag-auxiliary payunir ngan isurat dida an imo eskedyol.—Pr 21:5.

KITAA AN VIDEO NGA MAGIN MAISUGON NGA . . . PAYUNIR, NGAN BATONA AN MASUNOD:

• Ano an igintututdo ha aton han eksperyensya ni Sister Aamand mahitungod han mahigugmaon nga pag-ataman ni Jehova ha mga nagsasakripisyo basi magpayunir?