KON KAY ANO NGA IMPORTANTE: Pariho han kadam-an nga garamiton, an social network mahimo magin mapulsanon o makadaot. Nagdesisyon an pipira nga Kristiano nga diri gumamit hin social network. Ha luyo nga bahin, an iba nga Kristiano nagamit hito basi makigkomunikar ha ira kapamilya ngan kasangkayan. Kondi karuyag han Yawa nga gamiton naton ito ha diri maaramon nga paagi nga mahimo makadaot han aton reputasyon ngan espirituwalidad. Pariho kan Jesus, puydi naton gamiton an mga prinsipyo tikang ha Pulong han Dios basi mahibaroan an mga peligro ngan malikyan ito.​—Lu 4:4, 8, 12.

MGA LIT-AG NGA SADANG LIKYAN:

• Sobra nga paggamit han social media. An paggasto hin damu ka oras ha social network o social media mahimo makaubos han aton birilhon nga oras nga para unta ha espirituwal nga mga buruhaton

  Mga prinsipyo ha Biblia: Efe 5:15, 16; Fil 1:10

• Pagkinita hin kwestyonable nga barasahon o kiritaon. An pagkinita hin maglaw-ay nga retrato mahimo magtugway ha adiksyon ha pornograpiya o imoralidad. An pagbinasa hin mga artikulo o blog han mga apostata makakadaot han pagtoo han usa

  Mga prinsipyo ha Biblia: Mat 5:28; Fil 4:8

• An pag-post hin diri angayan nga comment o retrato. Tungod kay malimbungon an kasingkasing, may tendensya an tawo nga mag-post hin diri angayan nga comment o retrato. Kondi mahimo ini makadaot han reputasyon han iba o magpaluya han ira pagtoo

  Mga prinsipyo ha Biblia: Ro 14:13; Efe 4:29

KITAA AN VIDEO NGA MAGIN MAARAMON HA PAGGAMIT HAN SOCIAL-NETWORK, NGAN REPASOHA KON PAONAN-O MALILIKYAN AN MASUNOD NGA MGA EKSENA: