KON KAY ANO NGA IMPORTANTE: An personal nga pag-aram han Pulong han Dios nabulig ha aton nga ‘masabtan gud hin bug-os an kahilapad ngan kahilaba ngan kahitaas ngan kahilarom’ han kamatuoran. (Efe 3:18) Nabulig liwat ito ha aton nga magpabilin nga waray ikasaway ngan waray hugaw ha butnga hinin maraot nga kalibotan ngan padayon nga ‘makakapot hin marig-on ha pulong han kinabuhi.’ (Fil 2:15, 16) An personal nga pag-aram han Pulong han Dios nabulig ha aton nga makapili hin mga materyal nga aton ginkikinahanglan sugad nga indibiduwal. Paonan-o naton mapapahimulsan hin bug-os an panahon nga aton gin-gagahin ha pagbasa ngan pag-aram han Biblia?

KON PAONAN-O ITO BUBUHATON:

• Markahi an mga bersikulo ngan pagsurat hin mga nota ha imo personal nga kopya han Biblia, ha inimprinta man o ha elektroniko nga pormat

• Batona ini nga mga pakiana samtang ginbabasa mo an Pulong han Dios: ‘Hin-o? Ano? San-o? Diin? Kay ano? Paonan-o?’

• Hibaroi an mga detalye. Gamit an mga garamiton ha pagsaliksik, bilnga an mga impormasyon uyon ha topiko o ha mga bersikulo han Biblia

• Pamalandonga an imo nabasa basi makita kon paonan-o mo maiaaplikar an impormasyon

• Ig-aplikar an imo nahibaroan ha imo adlaw-adlaw nga pagkinabuhi.​—Lu 6:47, 48

KITAA AN VIDEO NGA PADAYON NGA ‘KUMAPOT HIN MARIG-ON’​—EPEKTIBO NGA PERSONAL NGA PAG-ARAM, NGAN BATONA AN MASUNOD:

• Paonan-o iginhulagway han pipira an personal nga pag-aram?

• Kay ano nga kinahanglan naton tikangan an kada pag-aaram pinaagi hin pag-ampo?

• Ano an makakabulig ha aton nga masabtan hin maopay an usa nga teksto ha Biblia?

• Ano nga klase hin mga marka an puydi naton ibutang ha aton personal nga Biblia?

• Kay ano nga importante gud an pagpamalandong kon ginbabasa naton an Pulong han Dios?

• Ano an angay naton buhaton ha aton nahibaroan?