An Memoryal naghahatag ha aton hin higayon nga mapamalandong an mga bendisyon ha tidaraon nga nagigin posible tungod han lukat. Usa hini amo an pagkabanhaw. Diri gud katuyoan ni Jehova nga an tawo mamatay. Tungod hito, masakit gud para ha aton an mamatayan hin hinigugma. (1Co 15:26) Nasubo hinduro hi Jesus han hikit-an niya an iya mga disipulo nga nagtataguminatay han namatay hi Lasaro. (Ju 11:33-35) Tungod kay hi Jesus an hingpit nga hulagway han iya Amay, makakasiguro kita nga nasasakitan hi Jehova nga makita kita nga nasusubo tungod han kamatay han aton hinigugma. (Ju 14:7) Ginpapamulat gud ni Jehova an panahon diin iya babanhawon an iya mga surugoon, ngan kinahanglan magin sugad liwat kita hito.—Job 14:14, 15.

Tungod kay hi Jehova Dios han kahapsay, makakasiguro kita nga magigin organisado an pagbanhaw han mga patay. (1Co 14:33, 40) Imbes nga mga paglubong, bangin magkaada kahikayan ha pagtapo ha mga ginbanhaw. Ginpapamalandong mo ba an paglaom nga pagkabanhaw, labi na ha panahon nga namatayan ka? (2Co 4:17, 18) Ginpapasalamatan mo ba hi Jehova ha pagtagana han lukat ngan ha pagpahibaro han kamatuoran ha Kasuratan nga mabubuhi utro an mga patay?—Col 3:15.

• Hin-o ha imo kasangkayan ngan kapamilya an imo karuyag makita utro?

• Hin-o nga mga tawohan ha Biblia an imo karuyag makita ngan makaistorya?