MAGIN MAS EPEKTIBO HA MINISTERYO
Pagpauswag han Aton Abilidad ha Ministeryo—Paghimo han Imo Presentasyon Para ha Magasin
KON KAY ANO NGA IMPORTANTE: Bisan kon an sampol nga mga presentasyon ha workbook para ha katirok nagtatagana hin mapulsanon nga mga ideya, mga suhestyon la ini. Sadang ka gumamit han imo kalugaringon nga mga pulong. Mahimo ka gumamit hin iba nga paagi o iba nga topiko nga maruruyagan ha iyo teritoryo. Katapos mo mabasa an magasin, mapamalandong an sampol nga mga presentasyon, ngan makita an mga pasundayag ha video, mahimo mo gamiton an masunod nga mga suhestyon ha paghimo han imo presentasyon.
KON PAONAN-O ITO BUBUHATON:
Pakianhi an imo kalugaringon, ‘Karuyag ko ba gamiton an usa han sampol nga mga presentasyon?’
OO
-
Andama an imo introduksyon. Katapos maghatag hin katalahoran, isumat ha halipot an rason han imo pagbisita. (Pananglitan: “Nabisita ako tungod kay . . .”)
-
Hunahunaa kon paonan-o mo ikakaw-ing an pakiana ha teksto ngan ha tanyag. (Pananglitan: Antes unabihon an usa nga teksto, mahimo ka sumiring: “Makikita dinhi an makapatagbaw nga baton hito nga pakiana.”)
DIRI
-
Pagpili hin topiko ha magasin nga naruruyagan mo ngan maruruyagan han mga tawo ha iyo teritoryo
-
Pagbangon hin makapainteres nga pakiana nga mag-aaghat ha tagbalay nga maghunahuna ngan makiistorya, kondi diri hiya maaalohan. (Pananglitan: An mga pakiana ha pahina 2 han mga magasin.)
-
Pagpili hin teksto nga babasahon. (Kon Pagpamata! an imo igintatanyag, mahimo ka diri magbasa hin teksto tungod kay ini nga magasin gindisenyo para hadton gutiay la an hinbabaroan ha Biblia ngan bangin waray ngani pagsarig ha relihiyon.)
-
Isaysay ha usa o duha nga sentence kon paonan-o magpapahimulos an tagbalay ha pagbasa han artikulo
KON OO MAN O DIRI
-
Pag-andam hin pakiana nga paghihisgotan ha imo pagbalik-bisita
-
Paghimo hin nota basi diri ka mangalimot han imo karuyag isiring ha imo pagbalik
