KON KAY ANO NGA IMPORTANTE: An libro han 1 Corinto usa han 14 nga mga surat ni apostol Pablo basi parig-unon an mga igkasi-Kristiano. Kon an usa nagsusurat, may panahon hiya nga pilion hin maopay an iya mga pulong, ngan puydi ito basahon hin pauroutro han iya ginsuratan. An mga surat usa nga maopay nga paagi basi makagsangyaw ha mga paryente ngan mga kakilala. Epektibo liwat ini nga paagi basi masangyawan an mga tawo nga diri naton nakakaistorya hin personal. Pananglitan, an usa bangin nagpakita hin interes pero diri hiya naaabtan ha balay. May pipira ha aton teritoryo nga bangin makuri makaistorya tungod kay naukoy hira ha mga apartment nga istrikto an seguridad, mga subdibisyon, o higrayo nga mga lugar. Ano an pipira nga mga butang nga sadang hinumdoman, labi na kon nagsusurat ha diri kakilala?

KON PAONAN-O ITO BUBUHATON:

• Isumat an imo igsisiring ha personal. Ipakilala an imo kalugaringon ha tinikangan han imo surat, ngan isumat hin matin-aw kon kay ano nga nagsusurat ka. Mahimo ka magbangon hin pakiana nga iya huhunahunaon, ngan ipakilala ha iya an aton website. Katapos, isumat ha iya an mahitungod ha Online Bible Study Lessons, ipakita kon paonan-o ginhihimo an pag-aram ha Biblia, o pag-unabi hin pipira nga mga ulohan han kapitulo han usa han aton mga publikasyon nga ginagamit ha pag-aram. Puydi maglakip hin literatura, sugad han contact card, imbitasyon, o tract

• Halipota la. Taposa an imo surat antes pa kapuyon pagbasa an imo ginsuratan.​—Kitaa an sampol nga surat

• Basaha ito hin maopay basi makita kon may sayop ito, malimpyo, ngan masayon basahon. Siguroha nga makisangkayon, mataktika, ngan positibo ito pamation.