An mga visual aid nabulig nga makuha an atensyon han magkirita ngan masabtan ngan mahinumdoman niya an iya hinbaroan. Gin-gamit ito han aton Gihitaasi nga Instruktor, hi Jehova, basi magtutdo hin importante nga mga leksyon. (Ge 15:5; Jer 18:1-6) Gin-gamit liwat ito han Bantogan nga Magturutdo nga hi Jesus. (Mat 18:2-6; 22:19-21) An usa nga klase hin visual aid nga napamatud-an nga mapulsanon gud hinin naglabay nga mga tuig amo an video. Ginagamit mo ba hin maopay an mga video kon nagtututdo ha imo mga gindudumarahan hin pag-aram?

Napulo nga video an igin-andam basi mabuligan kita nga itutdo an mga leksyon ha brosyur nga Maopay nga Sumat Tikang ha Dios! Kasagaran, an tagsa nga ulohan han video konektado ha usa han mga pakiana nga nakasurat ha madakmol nga letra ha brosyur. An digital nga bersyon ha jw.org/war may mga link nga nagpapahinumdom ha aton kon san-o ipapakita an tagsa nga video. Dugang pa, may iba nga mga video nga nahatag hin dugang nga impormasyon ha iba-iba nga publikasyon nga ginagamit ha pag-aram dida ha aton Toolbox ha Pagpanutdo.

May ginhihisgotan ka ba nga topiko ha Biblia nga bangin makuri masabtan han imo gindudumarahan? O naatubang ba hiya hin espisipiko nga pagsari? Pamiling ha jw.org/war ngan JW Broadcasting® hin video nga makakabulig ha iya. Mahimo niyo kitaon nga duha an usa hito nga mga video ngan katapos hisgotan ito.

Kada bulan, may iginrirelis nga bag-o nga mga video. Samtang ginkikita ito, hunahunaa kon paonan-o mo ito magagamit ha pagtutdo ha iba.