An ultimo nga Paskua ni Jesus magigin importante gud. Tungod kay hirani na hiya mamatay, karuyag niya kaunon an panihapon ha Paskua upod an iya mga apostol ngan tikangan an bag-o nga okasyon nga isasaurog kada tuig, an Panihapon han Ginoo. Salit ginsugo niya hira Pedro ngan Juan basi iandam an kwarto. (Lu 22:7-13; kitaa an retrato ha kobre.) Nagpapahinumdom ini ha aton nga kinahanglan ta mangandam para ha Memoryal ha Marso 27. An mga kongregasyon posible nga naghikay na para han magpapahayag, mga emblema, ngan iba pa. Pero sugad nga indibiduwal, paonan-o kita mangangandam para ha Memoryal?

Iandam an imo kasingkasing. Basaha ngan pamalandonga an nakaeskedyol nga pagbasa han Biblia ha Memoryal. Makikita ito ha Pag-usisa han Kasuratan Adlaw-adlaw. May makikita nga mas detalyado nga eskedyol ha Apendise B12 han Bag-o nga Kalibotan nga Hubad han Baraan nga Kasuratan. (Kitaa liwat an Abril 2020 nga isyu han Workbook Para ha Katirok ha Pagkinabuhi Ngan Ministeryo.) An mga pamilya puydi mamiling ha Watch Tower Publications Index o ha Giya ha Pagsaliksik Para ha Mga Saksi ni Jehova hin impormasyon mahitungod ha pagkaimportante han lukat nga ira magagamit ha ira pagsingba han pamilya.

Imbitara an iba nga umatender. Bug-os nga makigbahin ha kampanya ha pagpanaltag han imbitasyon. Hunahunaa kon hin-o an imo puydi imbitaron, sugad han mga ginbabalik-bisita, Bible study hadto, kakilala, ngan paryente. Kinahanglan siguruhon han mga tigurang nga maimbitar an mga diri aktibo. Hinumdumi nga kon may-ada ka kakilala nga diri naukoy ha iyo lugar, makikita mo an oras ngan lokasyon han Memoryal ha ira lugar pinaagi ha pag-click han tab nga MAHITUNGOD HA AMON ha igbaw nga bahin han home page han jw.org. Katapos, i-click an “Memoryal.”

Ano pa an puydi naton buhaton basi makapangandam?